काभ्रेपलान्चोक । काभ्रेपलान्चोकको मण्डन देउपुर नगरपालिकाले आर्थिक वर्षान्तसँगै उत्कृष्ट विद्यार्थी, शिक्षक र प्रधानाध्यापकसँगै विद्यालयलाई सम्मान गरेको छ । सोमबार एक विशेष समारोहबीच नगरपालिकाले सम्मानसँगै विद्यार्थीलाई पुरस्कार प्रदान गरेको हो ।
नगरपालिकाको मूल्यांकनमा स्थानीय ब्रह्मायणी माध्यमिक विद्यालयकी शिक्षक मिता भण्डारी ऐच्छिक द्वितीय विषयको सर्वोत्कृष्ट शिक्षक ठहरिएकीछिन् । उनलाई उक्त समारोहमा विशेष सम्मान प्रदान गरिएको थियो । त्यस्तै नगरपालिकाले तीनवटा विद्यालयका उत्कृष्ट प्रधानाध्यापक, २६ जना शिक्षक र १६ वटा विद्यालयलाई सम्मान गरेको नगरपालिकाका शिक्षा शाखा प्रमुख विनोद कार्कीले जानकारी दिएका छन् ।
कार्कीका अनुसार ५ कक्षाका ३ जना, ८ कक्षाका १५ जना, एसईईमा उत्कृष्ट नतिजा ल्याएका ६५ जना र प्लस टूका ६ जना विद्यार्थीलाई नगद पुरस्कारसहित सम्मान गरिएको हो ।
कार्यक्रममा शिक्षा समिति सदस्य गोविन्द पराजुलीले आफ्ना पिता विमानन्द पराजुली र माता मनमाय पराजुलीको नाममा मण्डन देउपुर नगरपालीमा दुई लाख रुपैयाँको अक्षयकोष स्थापनाको घोषणा गरेका छन् ।
समारोहमा नगरपालिकाका मेयर टोकबहादुर वाइवा, उपमेयर विष्णुमणि नेपाल र प्रमुख प्रशाशकीय अधिकृत अमृतकुमार धितालले शैक्षिक अवस्था सुधारका लागि शिक्षकलाई प्रोत्साहन गर्न नगरपालिकाले कन्जुस्याइँ नगर्ने प्रतिबद्धता व्यक्त गरेका छन् ।
