भक्तपुर । विश्व सम्पदा सूचीमा सूचीकृत भक्तपुरको चाँगुनारायण मन्दिर परिसरमा रहेको श्री सोमलिंगेश्वर महादेव मन्दिरको पुनर्निर्माण सम्पन्न भएको छ । गत कात्तिक १७ गते एक विशेष धार्मिक समारोह गरी पुनर्निर्मित मन्दिरको उद्घाटन गरिएको हो ।
पुनर्निर्मित मन्दिर समुद्घाटन समारोहमा ११ ब्राम्हण तथा आचार्यहरुले रुद्री परायण पाठ गरेका थिए । उक्त धार्मिक अनुष्ठानमा हवनसँग भजन पनि गायिएको थियो ।
त्यसै अवसरमा बजरंगबली हनुमानको मूर्तिको पनि प्राण प्रतिष्ठा स्थापना गरिएको थियो ।
काठमाडौंको इन्द्रायणी, पासिखेल निवासी स्वर्गीय गम्भीरबहादुर थापाका सन्तान नाति यादव थापा र सम्पूर्ण थापा परिवारको तर्फबाट करिब ३५ लाख रुपैयाँ सहयोग प्राप्त भइ उक्त मन्दिर पुनर्निमाण भएको थियो । उक्त सहयोग रकमका लागि पुजारी शंकर राजभट्टले विशेष पहल गरेका थिए ।
२०७२ सालको भूकम्पका कारण क्षतिग्रस्त उक्त मन्दिरको पुनर्निर्माणका लागि पुरातत्व विभागसँग पटकपटक अनुरोध गरिएको थियो । तर, विभागले कुनै वास्ता नगरेपछि पुजारी राजभट्टले विशेष पहल थालेका थिए ।
