काठमाडौं । रास्वपाका केन्द्रीय खेलकुद विभागका सदस्य शिव सिलवालले खेलकुदलाई मनोरञ्जनको साधनका रुपमा मात्रै बुझ्न नहुने बताएका छन् । खेलकुदले खेलाडीसँगै देशकै नाम अन्तर्राष्ट्रियस्तरमा चिनाउने भन्दै सिलवालले यस्तो बताएका हुन् ।
‘शक्तिशाली राष्ट्रहरूले प्रभुत्व जमाएको विश्वमञ्चमा नेपालले गर्वका साथ आफ्नो अलग पहिचान स्थापित गर्ने प्रमुख माध्यमहरूमध्ये खेलकुद क्षेत्र अग्रस्थानमा पर्दछ। खेलकुदले नेपालको राष्ट्रिय गौरव, नेपालीको क्षमता, प्रतिभा र पहिचानलाई विश्वसामु चिनाउने महत्वपूर्ण भूमिका निर्वाह गरेको छ’, सिलवाल भन्छन्, ‘नेपाली खेलाडीहरूले अन्तर्राष्ट्रिय प्रतियोगिताहरूमा देखाएको साहस, संघर्ष, अनुशासन र समर्पणले राष्ट्रको शिर उच्च बनाइरहेको छ। त्यसैले आजको युगमा खेलकुद केवल मनोरञ्जनको माध्यम मात्र होइन, देशको अस्तित्व, स्वाभिमान र राष्ट्रिय पहिचानलाई विश्वभर गर्वका साथ स्थापित गर्ने महत्वपूर्ण आधार हो।’
खेलकुदमार्फत नेपाललाई अन्तर्राष्ट्रिय स्तरमा चिनाउन सफल खेलाडीहरू राष्ट्रका गौरव भएकाले उनीहरुको सम्मानमा राज्यले कन्जुस्याँइ गर्न नहुने उनको भनाइ थियो ।
