काठमाडौं । सिन्धुपाल्चोकको सुनकोशी गाउँपालिकास्थित उखुबारीमा अवस्थित सामुदायिक होम स्टेको प्रवर्द्धनका लागि गाउँ पर्यटन प्रवर्द्धन मञ्च (भिटोफ)ले विशेष अध्ययन तथा प्रवर्द्धनात्मक कार्यक्रम सम्पन्न गरेको छ ।
बागमती प्रदेशको सँस्कृति तथा पर्यटन मन्त्रालयको आयोजनामा भिटोफले उखुबारीको सामुदायिक होम स्टेको अध्ययन भ्रमण गरेको हो । भ्रमणका क्रममा भिटोफको टोलीले ग्रामीण पर्यटन प्रवर्द्धनबारे विशेष विमर्ष गरेको उखुबारीका स्थानीय युवा पुष्पराज पराजुलीले जानकारी दिएका छन् ।
बुधबार र बिहीबार भएको भ्रमण टोलीमा भिटोफका अध्यक्ष हरिशरण थपलियासँगै प्रथम उपाध्यक्ष मनहरी दाहाल, द्वितीय उपाध्यक्ष विनोद वस्ती, महासचिव अजिब भट्ट, सचिव सुरेन्द्र भट्ट, कोषाध्यक्ष इन्दिरा रिमाल न्यौपाने, सह–कोषाध्यक्ष नारायण सोडारी तथा सदस्यहरू सुनिता अधिकारी न्यौपाने, प्रदीपकुमार तामाङ र माधव ढुङ्गानालगायत सहभागी थिए ।
यससंगै कार्यक्रममा ग्रामीण पर्यटन विज्ञहरु प्रा डा प्रेम शर्मा, प्रा डा बिपी बडाल, तरागाँउ विकास समितिका पूर्वसदस्य शिव प्रसाद लामिछाने लगायतले ग्रमीण पर्यटनका आयाम र सम्भावनाका बारेमा चर्चा गरेका थिए । कार्यक्रममा दर्जनौँ पर्यटन स्तम्भकारहरुको उपस्थिति रहेको थियो।
होम स्टे अध्ययन गर्न आएका पाहुनालाई उखुबारीका स्थानीयले पञ्चेबाजा बजाएर स्वागत गरेका थिए । उखुबारीमा आयोजना भएको प्रवद्र्धनात्मक कार्यक्रममा सुनकाशी गाउँपालिकाका प्रवक्ता एवम् वडा नम्बर ७ का वडाध्यक्ष ईश्वर तिमल्सिनाले ग्रामीण पर्यटनका लागि होम स्टेको आवश्यकता बढ्दै गएका बताएका थिए ।
कार्यक्रममा स्थानीय समाजसेवी एवम् राजनीतिक व्यक्तित्व तथा उक्त सामुदायिक होम स्टेका अध्यक्ष पुरुषोत्तम प्याकुरेलले पनि ग्रामीण पर्यटन प्रवद्र्धनमा आफूहरुले सक्दो प्रयास गरेको बताएका थिए ।
