चिनीको मूल्यमा अस्वभाविक वृद्धि, उपभोक्ता मारमा

काठमाडौं । पछिल्लो समय चीनको मूल्यमा अस्वभाविक वृद्धि भइरहेको छ । यतिसम्म कि, तीन सातामै प्रतिकिलो चीनको मूल्य १० रुपैयाँसम्मले बढेको छ । र, अझै महंगो मूल्यमा चीन ल्याएर बेच्ने तयारी भइरहेको छ ।

यसले तीज, दशैं, तिहार जस्ता ठूला चाडपर्वमा चीनको मूल्यले उपभोक्ताको ढाड सेक्ने निश्चित भएको छ । खुद्रा व्यापार संघका कोषाध्यक्ष वसन्त श्रेष्ठका अनुसार करिब तीन साताको अवधिमा चिनीको मूल्य किलोमा १० रुपैयाँ बढेको हो ।

अब सर्वसाधारणले चिनी किन्दा किलोको १ सय १५ रुपैयाँ तिर्नुपर्छ । महँगो चिनी आयात भए चाडबाडमा किलोकै डेढ सय रुपैयाँसम्म पुग्ने व्यवसायीहरुको दाबी छ ।

त्यसैले सरकारले बेलैमा व्यवस्था नगरे चाडबाडमा अझ मूल्य बढ्नेछ । गत वर्ष चाडबाडमा प्रतिकिलो चिनी १ सय ५० देखि १ सय ६० रुपैयाँसम्ममा बिक्री भएको थियो ।