काठमाडौं । काठमाडौं फोटोग्राफर संघ संघको १६ औं साधारणसभा सम्पन्न भएको छ । शनिबार बानेश्वरस्थित अर्पण ब्याङ्क्वेटमा आयोजित साधारणसभमा फोटोग्राफी प्रतियोगिताका विजेतालाई पुरस्कृत गर्दै सम्मान प्रदान गरिएको छ ।
प्रतियोगितामा नन्दु श्रेष्ठले प्रथम, उत्सव पुडासैनीले दोस्रो तथा अमिर महर्जनले तेस्रो स्थान हासिल गरेका थिए । समारोहमा संघका नवगठित विभिन्न एरिया समितिहरुलाई पनि सम्मानपत्र तथा सहयोगी संस्थाहरुलाई कदरपत्र प्रदान गरिएको थियो ।
काठमाडौं विश्वविद्यालय भाषा तथा आमसञ्चार विभाग प्रमुख निर्मलमणि अधिकारीको प्रमुख आतिथ्यता र संघका अध्यक्ष हरिप्रसाद घिमिरेको अध्यक्षतामा संघको १६ औं वार्षिक साधारण सभा सम्पन्न भएको हो ।
कार्यक्रममा अक्षरा स्कुलका प्रमुख राजेश शर्माले शुभकामना सन्देश राख्दै काठमाडौं फोटोग्राफर संघसंग हातेमालो गर्न पाउँदा आफू निकै खुशी रहेको र आगामी दिनमा समेत संघका निम्ति साथ,सहयोग गरिरहने प्रतिबद्धता जनाए ।
यसैगरी प्रमुख अतिथि निर्मलमणि अधिकारीले १६ औं बार्षिक साधारण सभामा आफू उपस्थित हुन पाउँदा खुशी रहेको बताए ।
कार्यक्रमको समापन गर्दै संघका अध्यक्ष हरिप्रसाद घिमिरेले वार्षिक साधारण सभाका उपस्थित सम्पूर्ण अतिथि, संघमा आवद्ध सम्पूर्ण पदाधिकारीहरुलाई धन्यवाद व्यक्त गरे ।
