काठमाडौं । भक्तपुरमा जन्मिएर नेपाली कला क्षेत्रमा चम्किँदै गरेका कलाकार राजेश गोसाइले चलचित्र कलाकार संघको सदस्यमा उम्मेदवारी दिएका छन् । यसअघि पनि सदस्यमा उम्मेदवारी दिएर पराजित भएका गोसाइले यसपटक भने आफ्नो जित सुनिश्चित जस्तै भएको दाबी पनि गरेका छन् ।
२०६० सालमा तामाङ भाषाको चलचित्र ‘ताम्सालिङ’बाट अभिनयमा डेब्यु गरेका गोसाइले दोखाग, ह्युला दुश्मन, मयुङलगायत थुप्रै चलचित्रमा काम गरिसकेका छन् । यससँगै उनले नेपाली भाषका चलचित्रहरु टेन्डर,कहि मिलन कहि बिछोड, उखान, राम बलराम, जन्जिर, तोरि लाउरे, भिमदत्तलगायतमा अभिनय गरेका छन् ।
२०३२ सालमा जन्मिएका गोसाइले आफ्नै इँटाभट्टा खोलेर व्यवसाय गर्नेदेखि जीवनमा थुप्रै आरोह–अवरोहको सामना गरेका छन् ।
चलचित्र कलाकार संघको आगामी जेठ ३ गते अधिवेशन हुँदैछ । अधिवेशनबाट सदस्यमा चुनिएपछि गोसाइले नेपाली चलचित्रको उत्थानसँगै विकृति, विसंगतिविरुद्ध कडा कदम चाल्ने प्रतिबद्धता व्यक्त गरेका छन् ।
