काठमाडौं । नेकपा (माओवादी केन्द्र)का महासचिव देव गुरुङले पुष्पकमल दाहाल नेतृत्वको सरकारले बिआरआई परियोजनालाई अगाडि बढाउन लागेपछि सरकार परिवर्तन भएको बताएका छन् ।
बिहीवार नेपाल कम्युनिस्ट पार्टी अन्तर्राष्ट्रिय विभागले आयोजना गरेको ‘बिआरआई वास्तविकता र भ्रम’ विषयक अन्तरक्रियामा बोल्दै महासचिव गुरुङले बिआरआई परियोजनालाई अगाडि बढाउन लागेपछि सरकार परिवर्तनको खेल शुरु भएको बताएका हुन् ।
उनले सन् २०१७ मा बिआरआईमा सम्झौता भएको उल्लेख गर्दै अहिले नीतिगत कार्यान्वयनसम्बन्धी सम्झौता गर्ने चरणमा रहेको पनि जानकारी दिए ।
दाहाल नेतृत्वको सरकारले नीतिगत कार्यान्वयनसम्बन्धी सम्झौता गरेर प्रक्रिया अगाडि बढाउन लागेकै बेला सरकार परिवर्तन भएको उनको भनाइ छ । दुई पक्षबीच हस्ताक्षर गर्ने तयारी भइरहेको बेलामा सरकार परिवर्तन भएको पनि उनले बताए ।
काँग्रेस–एमालेका बीचमा सरकार बनाउने सहमति भएको अघिल्लो दिन एक दलले ऋणसहितको बिआरआई लिनु हुँदैन भनेर वक्तव्य जारी गरेको भन्दै यसले सरकार परिवर्तन हुनुको एउटा ‘फ्याक्टर’ बिआरआई भएको देखाएको उनको जिकिर छ ।
