सुनकोशी गाउँपालिकाले दिएको मिनीटेलर दुरुपयोग भएको शंका

सिन्धुपाल्चोक । सुनकोशी गाउँपालिकाले आर्थिक वर्ष २०८१/८२ मा कृषकहरूलाई उत्पादन वृद्धिका उद्देश्यले वितरण गरेको मिनीटिलर (साना ट्र्याक्टर) सम्बन्धी महत्त्वपूर्ण सूचना जारी गरेको छ। गाउँपालिकाले जारी गरेको सूचनामा मिनीटिलर प्राप्त गर्ने लाभग्राहीहरूले उक्त सामग्रीको सही सदुपयोग नगरेको वा बिक्री गरेको आशंका व्यक्त गरिएको छ।

गाउँपालिकाका अनुसार नियमानुसार आवश्यक कागजातसहित मिनीटिलर वितरण गरिएको भए पनि हाल सामाजिक सञ्जालमा विभिन्न टिप्पणी तथा प्रतिक्रियाहरू आउन थालेपछि पालिकाले यस विषयमा ध्यानाकर्षण गराएको हो। सूचनामा भनिएको छ, ‘मिनीटिलर सम्पूर्ण लाभग्राहीहरूले सही ढङ्गले प्रयोग गरिरहेको भन्ने अपेक्षा गरिएको भए पनि केही लाभग्राहीहरूले बिक्री गरेको वा अन्यत्र प्रयोग गरेको भन्ने जानकारी पाइएकाले, यस्ता गतिविधि कानुन र नियम विपरीत भएकाले सम्बन्धित पक्षलाई कारबाही हुने व्यवस्था लागू हुनेछ।’

नियम विपरीत मिनीटिलर बिक्री वा दुरुपयोग गरेको पाइएमा कानुनी प्रक्रिया अनुसार कारबाही हुने स्पष्ट चेतावनी गाउँपालिकाले दिएको छ।