सिन्धुपाल्चोक । महालेखा परीक्षकको प्रतिवेदनअनुसार सिन्धुपाल्चोक जिल्लामा इन्द्रावती गाउँपालिकाले सबैभन्दा कम बेरुजु देखाएको छ। प्रतिवेदनमा इन्द्रावती गाउँपालिकाको बेरुजु जम्मा २३ लाख ५२ हजार रुपैयाँ रहेको उल्लेख छ, जुन लेखापरीक्षण रकमको १.१५ प्रतिशत मात्र हो।
यसै प्रतिवेदनअनुसार सिन्धुपाल्चोककै लिसंखु पाखर गाउँपालिकाले सबैभन्दा बढी बेरुजु देखाएको छ। लिसंखु पाखरको बेरुजु १ करोड ६० लाख ९६ हजार रुपैयाँ पुगेको छ, जुन लेखापरीक्षण रकमको ७.५७ प्रतिशत बराबर हो।
महालेखा परीक्षकको प्रतिवेदनले बेरुजुको अवस्था सुधार गर्न वित्तीय अनुशासन, पारदर्शिता र जवाफदेहितामा जोड दिनु पर्ने सिफारिस गरेको छ। इन्द्रावती गाउँपालिकाले समयमै लेखापरीक्षण, खर्च विवरण सार्वजनिक गर्ने, तथा अनुगमन र समिक्षालाई प्रभावकारी बनाएको जनाइएको छ।
सिन्धुपाल्चोक जिल्लाका अन्य स्थानीय तहहरूमा पनि बेरुजु देखिएको भएपनि इन्द्रावतीले उदाहरणीय प्रगति गरेको प्रतिवेदनले देखाएको छ।
