काठमाडौं । पछिल्लो समय सरकार फेरबदलको चर्चा व्यापक छ । खासगरी प्रधानमन्त्री पुष्पकमल दाहाल प्रचण्डले सत्तासमीकरणलाई शक्तिशाली बनाउन नागरिक उन्मुक्ति र जनमत पार्टीलाई सरकारमा सामेल गराउने प्रयास गरिरहेका छन् । जसका लागि माओवादी र एमालेले आफ्ना एक–एक मन्त्रीलाई फिर्ता बोलाउने तयारी गरेका छन् ।
स्रोतका अनुसार माओवादीले पर्यटनमन्त्री हितबहादुर तामाङ र एमालेले भूमीमन्त्री बलराम अधिकारीलाई सरकारबाट फिर्ता बोलाउन लागेका हुन् ।
गत फागुन २१ गते एमालेसहितको नयाँ समीकरण बनेपछि एमालेले सरकारमा अघिल्लो वर्षकै सेट पठाएको थियो । तामाङ सोही दिन मन्त्री भएका थिए । मन्त्री भएको तीन महिनापछि तामाङको पद धरापमा पर्ने सम्भावना देखिएको छ ।
नाउपाबाट अध्यक्ष रञ्जिता श्रेष्ठ आफैँ सरकारमा जाने तयारीमा छिन् । जपाबाट अध्यक्ष सीके राउतले नेतृत्व गर्ने कि अन्यलाई पठाउने भन्नेमा कुनै निर्णय भएको छैन । श्रेष्ठलाई पर्यटन मन्त्री बनाउन प्रधानमन्त्री सकारात्मक देखिएका छन् ।
नाउपा अध्यक्ष श्रेष्ठले सरकारमा जाने विषयमा प्रधानमन्त्रीसँग छलफल भएको स्वीकारेकी छन् । जेठ १८ गते प्रधानमन्त्री निवास बालुवाटारमा भएको भेटवार्तामा पर्यटन मन्त्रालय दिने विषयमा प्रधानमन्त्री सकारात्मक रहेको उनले बताएकी थिइन् ।
माओवादीभित्र पुराना सबै मन्त्रीलाई फिर्ता बोलाउनुपर्ने आवाज पनि उठिरहेको छ ।
