प्रदर्शनमा साथ नदिएपछि पोखरेलीको घरदैलो चहार्दै रास्वपाका नेता कार्यकर्ता

काठमाडौं । पूर्वगृहमन्त्री एवम् पार्टी सभापति रवि लामिछाने पक्राउ परेपछि यतिबेला राष्ट्रिय स्वतन्त्र पार्टीका नेता कार्यकर्ताहरू पोखरा केन्द्रित प्रदर्शनमा छन् । र, रास्वपाले देशैभरीबाट कार्यकर्तालाई प्रदर्शनमा आउन उर्दी जारी गरेको छ । तर अपेक्षा गरेजस्तो कार्यकर्ता नआएपछि रास्वपाका नेता तथा कार्यकर्ता निराश भएका छन् ।

यससँगै उनीहरु प्रदर्शनमा सहयोगको याचनासहित पोखरेलीको घरदैलोमा पुगिरहेका छन् । मंगलबार रास्वपाकी केन्द्रीय सदस्य डाक्टर तोसिमा कार्की र रमेश प्रसाईं सराङकोट पुगेका थिए । उनीहरुले त्यहाँका नागरिक अगुवा र आफ्ना समर्थकहरूलाई भेटेर आन्दोलनमा पोखरा झर्न आग्रह गरेका थिए ।

त्यस्तै केन्द्रीय सदस्य हरि ढकालले मंगलबार दिभनर बिरौटा क्षेत्रमा घरदैलो गरेका थिए । प्रत्येक घरमा चुनावी प्रचारको समयझैं छिरेर प्रदर्शनमा आउन उनले आग्रह गरेका थिए । रास्वपाले मंगलबार १० वटा समूह बनाएर घरदैलोमा खटाएको थियो । पार्टी प्रवक्ता मनिष झाले भने अमरसिंह क्षेत्रको घरदैलो गरेका थिए ।