काठमाडौं । रास्वपाले संसदमा निभाइरहेको भूमिकाबारे प्रश्न उठ्न थालेको छ । भिजिट भिसा प्रकरणमा निरन्तर सदन अवरुद्ध गरिरहेको रास्वपाको भूमिकामाथि प्रश्न उठेको हो । उसले आफ्ना पार्टी सभापति रवि लामिछानेको मुद्दासँग भिजिट प्रकरण साट्नका लागि निरन्तर सदन अवरुद्ध गरेको आरोपसमेत लागेको छ ।
यससँगै रास्वपाको लिँडेढिपीका कारण संसदीय गतिविधिमा असर परेको हो । गृहमन्त्री रमेश लेखक मुछिएको भिजिट भिसा प्रकरणको छानबिनका लागि न्यायिक वा संसदीय समिति गठनको माग गर्दै संसदको चौथो ठूलो दल रास्वपा गत जेठ १३ गतेबाट संसदमा नाराबाजी गर्दै आएको हो । नेपाली राजनीतिका पुराना भनिने ती ठूला दलहरूभन्दा फरक ढंगले आफूलाई संसद्भित्र र बाहिर प्रस्तुत गर्दै आएको रास्वपाका सांसदहरू मंगलबार घाँटीमा नीलो रिबन पहिरिएर संसदमा उपस्थित भए ।
तर, प्रतिपक्षी रास्वपाका सांसदहरू नीलो रिबन पहिरिएर सदनमा उपस्थित भएको सत्ताधारी नेपाली कांग्रेसलाई पाच्य भएन । संसद् बैठकमा रास्वपा सांसद डा। चन्दा कार्कीलाई सभामुख देवराज घिमिरेले बोल्नका लागि उपलब्ध गराएको समय सकिने बित्तिकै कांग्रेसले नियमापत्ति जनायो । नियमापत्ति जनाउने क्रममा कांग्रेसका प्रमुख सचेतक श्यामकुमार घिमिरेले नीलो रिबन पहिरिएर संसदमा उपस्थित भएका रास्वपाका सांसदहरूलाई बैठकबाट निष्कासन गर्न माग गरे ।
उनले प्रतिनिधिसभा नियमावली २०७५ को परिच्छेद ६ को ३० मा अभद्र व्यवहार नियन्त्रणको व्यवस्था रहेको स्मरण गराए । मंगलबारभन्दा अघिल्ला दिनका बैठकमा रास्वपाका सांसदहरूले प्रतिपक्षी दलका सांसदले रोष्ट्रममा गएर बोल्दा मौन रहने र सत्तापक्षका सांसद बोल्दा वेल घेराउ गरेर नाराबाजी गर्ने गरेको दृष्य संसदमा देखिएका थियो । यस्तै उनीहरू थकाइ मार्न बेला–बेलामा वेलमै पलेँटी कसेर बस्दै पनि आएका थिए ।संसद्मा रास्वपाका सांसदहरूको ती दृष्यलाई लिएर सामाजिक सञ्जालहरूमा आलोचना भएको थियो ।
सत्ताको नेतृत्व गरिरहेको नेकपा एमालेका सांसद सूर्यबहादुर थापा क्षेत्रीले रास्वपाका सांसदहरू वेलमै पलेँटी कसेर बसेपछि ‘ब्रोइलर कुखुरा’ को संज्ञासमेत दिएका थिए । जे–जे भए पनि माओवादीले साथ छाडेपछि रास्वपा नराम्ररी अप्ठेरोमा परेको छ । संसद अवरोध खोलौं हारेको जस्तो देखिने, निरन्तर आन्दोलन गरौं पुगिने गन्तव्य नै छैन । यहीं निहुमा सरकारले आफ्ना पार्टी सभापति रवि लामिछानेको मुद्दा कमजोर बनाउँछ भन्ने आशमा थियो, रास्वपा । तर सरकार त्यो मनस्थितिमा देखिँदैन । र, रास्वपा नराम्ररी अप्ठेरोमा फसेको छ ।
