काठमाडाैं । पछिल्ला दिनमा माओवादी अध्यक्ष पुष्पकमल दाहाल ‘प्रचण्ड’ र कांग्रेस सभापति शेरबहादुर देउवाबीच हिमचिम बढेको छ । प्रचण्ड र देउवाबीच हिमचिम बढेपछि प्रधानमन्त्री एवम् एमाले अध्यक्ष ओली भने तनावमा परेका छन् । खासमा देउवाले ३० मिनेट कान फुकेपछि नै प्रचण्ड संसदको अवरोध खुलाउन तयार भएका थिए ।
त्योबेलादेखि नै उनीहरुको हिमचिम बढेको हो । र पछिल्लो समय उनीहरुबीच निकै घनिष्टता बढेको पाइएको छ । यससँगै नेपाली राजनीतिमा अर्कैखाने खिचडी पाक्ने आकलन गरिएको छ । छैटौँ पटक प्रधानमन्त्री हुने दौडमा रहेका देउवा जुनसुकै समीकरणबाट भए पनि त्यसको सुनिश्चितता चाहन्छन् ।
गठबन्धन फेरिरहँदा त्यो सम्भावना कम हुनेमा सचेत रहेका उनी अर्को विकल्प तयार नहुँदासम्म ओलीको साथ छोड्ने पक्षमा छैनन् । एमाले र रास्वपालाई बाहिर राखेर संख्या पुर्याउन भित्रभित्रै गृहकार्य चलेको भए पनि देउवाले प्रचण्डको विश्वास गरिसकेका छैनन् । ओलीले प्रत्येक भाषणमा ‘समयमै सत्ता हस्तान्तरण गर्छु’ भन्नुको कारण पनि त्यही हो । बुझिएअनुसार देउवासँगको पछिल्लो भेटमा प्रचण्डले त्यो विश्वास दिलाउन प्रयास गरेका थिए ।
भिजिट भिसा प्रकरणमा गृहमन्त्री रमेश लेखकको राजीनामा र उच्चस्तरीय छानबिन आयोग गठनलाई बटमलाइन बनाएर जेठ १३ गतेदेखि संसद अवरोध गरेको माओवादी ३० गते पुग्दा नपुग्दै एकाएक सदन खोल्न तयार भयो । त्यसअघि प्रचण्डसहित माओवादी नेताहरूले छानविन आयोग–समिति गठनको सुनिश्चितता नहुँदासम्म कुनै हालतमा अडान नछोड्ने भनेका थिए । तर, संसदीय संघर्षमा सँगै रहेको रास्वपालाई अलपत्र पारेर एकाएक सत्तासँग सम्झौता गर्न पुग्यो ।
अमूर्त भाषमा लेखिएको दुई बुँदे सम्झौताको टालोले मुख छोपेर माओवादी नेतृत्व संसद खुलाउन तयार हुँदा कार्यकर्तापंक्ति भने आक्रोशित छ । त्यसो त, अग्नि सापकोटाको मुद्दासँग भिजिट भिसा प्रकरण साँटिएको भन्नेहरू पनि छन् ।
तर, बुझ्नुपर्ने कुरा के हो भने जनयुद्धकालीन मुद्दा खेपिरहेका सापकोटालाई कांग्रेस र माओवादीले मिलेर जोगाउन सम्भव छैन । किनभने सर्वोच्च अदालतमा विचाराधीन यो मुद्दा राजनीतिक सहमतिका आधारमा छिनोफानो हुनै सक्दैन ।
