जुगलको तेगामा हेलिकोप्टरबाट खाद्यान्न लगियो

काठमाडौं । पहिरोले गाउँ पुरेर विस्थापित सिन्धुपाल्चोकको जुगल गाउँपालिका– ३ तेगाका स्थानीयलाई नेपाली सेनाको हेलिकोप्टरबाट खाद्य सामग्री लगिएको छ। १२ गते बिहान गएको पहिरोले नौ घरमध्ये पाँच घर पुरेको छ।

गाउँका सबै मानिस विस्थापित भएका छन् उनीहरुलाई अहिले सुरक्षित स्थानमा सारिएको छ । घरमा भएका खाद्यान्न पहिरोमा पुरिएपछि दुई दिनदेखि यहाँ खाने कुराको अभाव थियो ।

अहिले जुगल गाउँपालिकाको अनुरोधमा नेपाली सेनाले खाद्य सामग्री पुर्‍याएको छ । हेलिकोप्टरबाट १० बोरा चामल, दुई बोरा दाल, नुन, चिउरा, तेल, लत्ताकपडा र ब्ल्यांकेट लगिएको छ।