काठमाडौं । पछिल्ला केही दिनदेखि अत्याधिक गर्मी बढेपछि महोत्तरीका केही स्थानीय तहहरूले विद्यालयहरू धमाधम बन्द गर्न थालेका छन् । बालबालिकालाई विद्यालयमा पठनपाठन गर्न जाँदा गर्मी असह्य हुन थालेपछि मनरा सिस्वा नगरपालिका, जलेश्वर नगरपालिका, बर्दीबास नगरपालिका, एकडारा गाउँपालिका र महोत्तरी गाउँपालिकालगायतले सो निर्णय गरेको हो ।
महोत्तरीमा पछिल्लो केही दिनदेखि ३५ देखि ४० डिग्री सेल्सियस तापक्रम छ। अध्यधिक गर्मीका कारण बालबालिकामा पानीको कमी हुन गई झाडापखाला, बान्ता, कमजोरी, मूर्च्छा पर्नेलगायतका विभिन्न समस्या आउन सक्ने चिकित्सकको भनाई छ ।
बालबालिकालाई गर्मीबाट जोगाउनु अति आवश्यक रहेको र निरन्तर सादा पानीसँगै जीवनजल, कागतीलगायतका तरल पदार्थहरूको सेवन गराउनु आवश्यक हुन्छ । गर्मीकै कारण आँखा पाक्नेलगायतका अन्य स्वास्थ्य समस्यासमेत देखिन सक्ने चिकित्सकको भनाइ छ।
