धुलिखेल-खावा सडकमा यस्तो हरिबिजोग कहिलेसम्म ?

काठमाडौं । विस्तारका लागि भन्दै भत्काइएको अरनिको राजमार्गअन्तर्गत धुलिखेल–खावा सडकखण्ड बिगारेको वर्षौं भइसक्यो । अझ ठेकेदार विस्तारको काम सक्नुपर्ने अवधि सकिएको पनि पाँच महिना भइसक्यो ।

तर, विस्तार सम्पन्न हुनु त कता हो कता, अहिलेसम्म २० प्रतिशत काम पनि सकिएको छैन । भक्तपुरस्थित सडक डिभिजन कार्यालयका अनुसार काठमाडौंको गौरीपार्वती निर्माण सेवा नामक निर्माण कम्पनीको लापरबाहीका कारण यो सडक निर्माण समयमै सम्पन्न हुन नसकेको हो ।

राजधानी काठमाडौंबाट काभ्रेपलाञ्चोक, सिन्धुपाल्चोक, दोलखा, रामेछाप र चीनको खासा बजारसम्म पुग्न सकिने यो सडक नेपालको एक प्रमुख व्यापारिक सडक पनि हो । केही वर्षदेखि जीर्ण बन्दै भएको धुलिखेल–खावा सडकखण्डलाई १२ मिटरको फराकिलो बनाइ कालोपत्र गर्न लागिएको हो ।