काठमाडौं । तपाईंले भोलि र पर्सिका लागि कुनै लामो यात्रा वा घर बाहिर हुने कुनै पनि काम तथा कार्यक्रम तय गर्नुभएको छ भने निकै सावधानी अपनाउनपर्ने भएको छ । किनकि, जल तथा मौसम विज्ञान विभागको मौसम पूर्वानुमान महाशाखाले भोलि र पर्सि देशका अधिांश भूगोलमा अतिभारी वर्षा हुने जनाएको छ ।
महाशाखाका अनुसार भारतको छत्तीसगढ आसपास बनेको न्यूनचापीय प्रणालीको असरले बिहीबार र शुक्रबार लुम्बिनी र सुदूरपश्चिममा भारीदेखि धेरै भारी वर्षाको सम्भावना छ । वर्षाले बाढी, पहिरो र डुबानको समस्या निम्त्याउनसक्ने सम्भावना छ । त्यसबाट दैनिक जनजीवनसँगै हवाई, सडक यातायात र पर्यटन क्षेत्र पनि प्रभावित हुने सम्भावना रहेकाले सतर्कता अपनाउनुपर्ने मौसमविद्हरुको भनाइ छ ।
भारीदेखि धेरै भारी वर्षाले निम्त्याउनसक्ने जोखिमबारे जानकारी दिन महाशाखाले विशेष बुलेटिन जारी गर्ने तयारीसमेत गरेको छ । अहिले देशभर नै मनसुनी वायुको प्रभाव छ । विभागका अनुसार आगामी २४ घण्टामा कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ ।
