अस्ट्रेलियाले घटायो विदेशी विद्यार्थीको कोटा

काठमाडौं । अष्ट्रेलियाल फेरिे विदेशी विद्यार्थीको कोटा घटाएको छ । आप्रवासी विद्यार्थीलाई नियन्त्रण गर्ने सरकारी नीतिअनुसार अष्ट्रेलियाले सन् २०२५ मा दुई लाख ७० हजार विदेशी विद्यार्थीलाई मात्रै अध्ययन भिसा दिने भएको हो ।

अस्ट्रेलियन शिक्षामन्त्री जेसन क्लेयरले मंगलबार पत्रकार सम्मेलन गर्दै अन्तर्राष्ट्रिय विद्यार्थीहरूका लागि तोकिएको सीमाबारे जानकारी दिएका हुन् । नयाँ सीमाअनुसार अन्तर्राष्ट्रिय विद्यार्थीहरूको संख्या विश्वविद्यालयका लागि १ लाख ४५ हजार र व्यवहारिक र सीपमा आधारित पाठ्यक्रमका लागि ९५ हजारसम्म सीमित गरिनेछ ।

कोरोना महामारीपछि अष्ट्रेलियाले लचिलो नीति लिएसँगै अन्तर्राष्ट्रिय विद्यार्थीको संख्यामा उल्लेख्य वृद्धि भएको थियो । त्यसलाई न्यूनीकरण गर्न अष्ट्रेलियाले नयाँ आप्रवासन नीति सार्वजनिक गर्दै विदेशी विद्यार्थीलाई कडाइ गर्दै आइरहेको छ ।