काठमाडाैं । राष्ट्रिय स्वतन्त्र पार्टीका निष्कासित महामन्त्री मुकुल ढकालले पार्टी सभापति एवम् पूर्वगृहमन्त्री रवि लामिछाने ठग, भ्रष्टाचारी र अपराधी भएको ठोकुवा गरेका छन् ।
उनले लामिछाने बेइमान भएको पुष्टि गर्न आफूसँग प्रशस्त प्रमाण भएको दाबीसमेत गरेका छन् । रावि लामिछानेलाई सम्बोधन गर्दै उनले भनेका छन्, ‘तपाईं ठग, भ्रष्ट्राचारी र राहदानी दुरूपयोग गर्ने अपराधी हो भनेर प्रमाणित गर्न सक्छु । कारबाहिको दुस्साहस गर्दै हुनुहुन्छ, सक्नुहुन्छ भने मलाई गलत सावित गर्नुहोस् । तपाईंको कुकर्मको पर्दाफास गर्नु पार्टीविरूद्ध लाग्नु होइन, यो पार्टी हितमा हो । राष्ट्रिय ठगको चर्चा राष्ट्रियस्तरमा हुन्छ, पार्टीभित्र मात्र सिमित हुँदैन । तपाईं जस्तो ठग, भ्रष्ट र अपराधीको कब्जाबाट पार्टीलाई मुक्त गराएरै छाड्छु ।’
ढकालले सभापति लामिछानेलाई राहदानी प्रकरणमा कहिल्यै चुनाव लड्न नपाउने गरी जेल पठाउनसक्नेसमेत बताएका छन् । रास्वपाले सोधेको स्पष्टीकरणको जवाफ लेख्दै ढकालले यस्तो बताएका हुन् ।
