काठमाडाैं । तत्कालीन प्रधानमन्त्री केपी शर्मा ओलीले संसद विघटन गरेर प्रतिगामी कदम चालेको भन्दै माधव नेपालले एमाले फोरेर नयाँ पार्टी बनाए– नेकपा एस । त्यतिबेला पार्टी फोड्नुको निहुँ संसद विघटन भए पनि कारण थियो– एमाले अध्यक्ष एवम् प्रधानमन्त्री ओलीसँगको इगो ।
माधव नेपालले एमाले फुटाएर नयाँ पार्टी बनाउनुको औचित्य पुष्टि गर्न त सकेनन् नै ! अहिले पार्टी जोगाउनसमेत उनलाई हम्मेहम्मे परेको छ ।
‘विश्व कम्युनिस्ट आन्दोलन जोगाउन’ भन्दै एमाले फोरेका नेपाल अस्तित्वकै संकटमा पुग्नु दुर्भाग्यपूर्ण छ । खासगरी– जसरी पनि प्रधानमन्त्री हुने एकमात्र उद्देश्य बोकेका नेपाल अहिले अत्यन्तै छटपटी र बेचैनीमा छन् । र यसैकारण पार्टीमा दुईधार बनेको छ । माधव नेपालको अतिसत्तामोहका कारण नेताहरुमात्र होइन, सांसदहरु नै विभाजित हुन थालेका छन् भने मन्त्री नपाएको झोँकमा रहेका केही सांसदहरु पार्टी विभाजनको तयारीमा जुटिसकेका छन् ।
पार्टी विभाजन रोक्ने उपायको खोजीमा रहेका माधव नेपाल अहिलेको सत्ता गठबन्धनसँग केन्द्रमा सँगै बस्ने र प्रदेश सरकार हेरफेरमा कांग्रेससँग पनि मिल्ने रणनीतिमा छन् । र यसकै लागि उनले कांग्रेससँग हिमचिम बढाएका छन् । तर पार्टीका सम्मानित नेता झलनाथ खनाल भने नेपालको उक्त गतिविधिप्रति सन्तुष्ट छैनन् ।
अध्यक्ष नेपाल गठबन्धनको विकल्प खोज्ने तर अर्का नेता गठबन्धन बलियो बनाउने कसरतमा लागेपछि पार्टीभित्र विवाद चुलिएको हो । स्रोतका अनुसार अहिलेको गठबन्धनको विकल्पमा जानका लागि उपाध्यक्ष प्रमेश हमाल र राजेन्द्र पाण्डेबाहेक अधिकांश पदाधिकारी असहमत छन् ।
कांग्रेससँग मिलेर नयाँ गठबन्धन बनाउने बाटोमा रहेका माधव नेपालले एमाले र माओवादी केन्द्रलाई सत्ताबाहिर राखेर जानुपर्ने पक्षमा हिसाबकिताब गरिरहेका छन् । जनता समाजवादी पार्टीको विभाजनको टुंगो अदालतबाट लागेपछि अन्तिम हिसाबकिताब गर्ने उनको तयारी छ ।
गैरकम्युनिष्ट धारको सरकार बनाउने तर त्यसमा माधव नेपाल चाहिँ अटाउने गरी गठबन्धन बनाउन कांग्रेस सहमत भइसकेको बुझिएको छ ।
