काठमाडौं । चलचित्र विकास बोर्डको अहिलेका अध्यक्ष भुवन केसीको कार्यकाल यही साउन ९ गते सकिइसकेको छ । र, नयाँ अध्यक्षका लागि दरखास्त आह्वान पनि भइसकेको छ। सञ्चार तथा सूचना प्रविधि मन्त्रालयले बोर्डको अध्यक्षका लागि योग्यता पुगेका इच्छुक व्यक्तिलाई १५ दिनभित्र आवेदन दिन भनेको छ ।
सूचनाअनुसार आवेदकले मान्यता प्राप्त शिक्षण संस्थाबाट कुनै विषयमा कम्तिमा पनि प्रवीणता प्रमाणपत्र तह उत्तीर्ण गरी नेपाली चलचित्र उद्योगको स्थापना, विकास संरक्षण, संवद्र्धन तथा प्रवद्र्धनमा निरन्तर कम्तिमा १० वर्ष काम गरेको हुनुपर्ने उल्लेख छ ।
विकास बोर्डमा सामान्यतया जसको सरकार छ, उही निकटको व्यक्तिले नियुक्ति पाउने परम्परा छ । जसअनुसार यसपटक नेकपा एमालेनिकट व्यक्ति नै बोर्डको अध्यक्ष हुने निश्चितजस्तै छ ।
यसपटक बोर्ड अध्यक्षका लागि सबैभन्दा बलियो दाबेदारका रुपमा देखिएका छन्, अभिनेत्री करिश्मा मानन्धर र निर्देशक दिनेश डिसी । उनीहरुसँगै अर्जुनकुमार डंगोल, दयाराम दाहाल र नरेन्द्र मर्हजनले आकांक्षा राखेका छन् । दाहाल पूर्व अध्यक्ष हुन भने महर्जन र डंगोल चलचित्र निर्माता तथा सिनेमा हल व्यवसायी हुन् । डीसी एमाले निकटका कलाकर्मीहरुको संगठनका अध्यक्ष हुन् । त्यस्तै नायिका मानन्धर २ वर्षअघि एमालेमा प्रवेश गरेकी हुन् ।
आधा दर्जनले आकाँक्षा राखेपनि डीसी र मानन्धरबीच नै टक्कर हुने देखिएको छ ।
