गौशाला २६ भन्छिन्: कतिपयले सन्दिपविरुद्ध भ्रमपूर्ण खबर दिएर ममाथि दबाब बढाएका थिए

काठमाडौं । क्रिकेटर सन्दिप लामिछानेविरुद्धको मुद्दामा पुनरावेदन नगर्ने निष्कर्षमा पुगेकी गौशाला २६ ले आफ्नो मानसिक असरको फाइदा उठाउँदै केही व्यक्ति तथा संस्थाले प्रतिवादी विरुद्ध भ्रमपूर्ण खबर प्रेषित गरेको र आफूमाथि दबाब बढाएको बताएकी छन् । उनले उक्त मुद्दामा पुनरावेदन नगर्न माग गर्दै शुक्रबार उच्च सरकारी वकिलको कार्यालय पाटनमा निवेदन दिएकी हुन् ।

जिल्ला अदालतले क्रिकेटर सन्दिप लामिछानेलाई बलात्कार मुद्दामा दोषी ठहर गरी ८ वर्ष कैद फैसला गरेको थियो । जिल्लाले पीडितलाई नाबालिक भन्न नमिल्ने फैसला गरेको थियो । तर, उच्च अदालत पाटनले भने बलात्कारको वस्तुनिष्ट प्रमाणको अभाव रहेको र पीडित नाबालिग नदेखिएको भन्दै लामिछानेलाई सफाइ दिएको थियो ।

फैसलाको पूर्णपाठ बुझेको ७० दिनभित्र पुनरावेदन गर्न सकिने प्रावधान रहेको छ । गौशालाले आफ्नो निवेदनमा फैसलाको पूर्णपाठ आफूले अध्ययन गरिसकेको बताएकी छन् ।