काठमाडाैं । विल्कुल फरक स्वभाव र चरित्रका दुई पात्राः रवि लामिछाने र बालेन साहबीचको एकता लामो समय नटिक्ने प्रक्षेपण भइरहकैबेला उनीहको सम्बन्ध धमिलिएको सूचना बाहिरिएको छ । आफ्नो राजनीतिक भविष्य अनिश्चित देखेकै कारण बालेनलाई चुनावी अभियानको नेतृत्व दिन तयार भएका रवि लामिछाने अब कसरी अघि बढ्ने भन्नेमा विचाराधीन छन् ।
बुझिएअनुसार चुनाव सकिएपछि सर्वोच्च अदालतले महान्यायाधिवक्ता सविता भण्डारीले फिर्ता लिने भनी गरेको निर्णय उल्टाउने सम्भावना ९० प्रतिशतभन्दा बढी छ । त्यसैले पनि त्यो बेला सरकारको नेतृत्व बालेनले गर्छन् भन्ने धेरैको बुझाइ छ । र अहिले रविलाई सल्लाह र सहयोगचाहिँ रास्वपाका उपसभापति स्वर्णिम वाग्लेले गरिरहेका छन् । जो रविलाई पार्टी सभापतिका रुपमा समेत लामो समय देख्न चाहँदैनन् ।
राष्ट्रिय स्वतन्त्र पार्टीको विधानमा संसदीय दलको नेता चयनसमेत पार्टी सदस्यहरूले निर्वाचनको माध्यमबाट गर्ने र पार्टी सभापति नेता हुने व्यहोरा उल्लेख छ । त्यसको अर्थ हो– यदि चुनाव जितेर आए भने रवि लामिछानेले नै दलको नेतामा प्रतिस्पर्धा गर्न बेर लगाउँदैनन् । त्यो बेला अहिले भावी प्रधानमन्त्री घोषित भइसकेका बालेनलाई कसरी व्यवस्थित गर्ने भन्ने कुराले ठूलै भूकम्प ल्याउने सम्भावना छ ।
महान्यायाधिवक्ता सविता भण्डारीले रविको मुद्दा फिर्ता लिएको निर्णय सर्वोच्च अदालतका धेरै न्यायाधीशलाई चित्त बुझेको छैन । त्यसैले निर्वाचनपछि रवि फेरि जेल जाने सम्भावना नै प्रबल रहेको तर्क गरिरहेका छन् । यी सबै कारणबाट अहिले अघोषितरुपमा रवि र बालेनबीच शक्ति संघर्षको थालनी भइसकेको छ । र, बुझिएअनुसार रवि लामिछाने माघको अन्तिम साता भारत जाँदैछन् ।
उनी भारतको नयाँ दिल्ली र बैंगलोरमा रहेका नेपालीसँग भोट भाग्न त्यता जान लागेका हुन् । रविको भारत यात्रालाई पनि बालेनसँग जोडेर हेरिएको छ । जनकपुरमा माघ ५ गतेको भाषणपछि उनीहरुले मञ्च सेयर गरेका छैनन् । झापालगायत पूर्वको भ्रमणबाट फर्केका साहले काठमाडौंमा रविलाई भेटेनन् ।
पार्टी कार्यालय पनि पुगेनन् तर माघ १२ गते दिनभर कुपुण्डोलको सम्पर्क कार्यालयमा आफ्ना मान्छेलाई भेटेर बालेन सुदूर पश्चिम फर्किए अनि झापा गएका छन् । यी सबै घटनाक्रमले रवि र बालेनबीच सम्बन्ध धमिलिएको धेरैको अनुमान छ ।
