काठमाडौं । नेपाली राजनीतिमा अति नै अश्थिर र वैचारिक विचलन भएका नेताको पहिचान बनाएका बाबुराम भट्टराईले पछिल्लो समय राष्ट्रिय स्वतन्त्र पार्टी (रास्वपा)मा आँखा लगाएका छन् । कुनै बेला माओवादी अध्यक्ष प्रचण्डका सहयात्री भट्टराईले नयाँ शक्ति खोलेर वैकल्पिक राजनीतिक दलको अभ्यास गरे । तर त्यसपछि पनि अनेक पार्टी र संगठन गठन, विघठन गरेका बाबुरामले पछिल्लो समय रास्वपामा आँखा लगाएका हुन् ।
कम्युनिस्ट विचारधाराबाट समेत च्युत भएका बाबुराम अहिले जसरी पनि रवि लामिछानेलाई जेलबाट निकाल्नुपर्ने बताइरहेका छन् । सहकारी ठगीको अभियोगमा अदालतले नै पुर्पक्षका लागि थुनामा राखेका लामिछानेलाई जसरी पनि जेलबाट निकालेर उनकै नेतृत्वमा वैकल्पिक पार्टी बनाउनुपर्ने भनेर बाबुरामले भन्नुलाई सामान्य मान्न सकिँदैन । यसको पछाडि बाबुरामका आफ्नै स्वार्थ छन् । पछिल्लो समय कतै पनि नबिकेका र नटिकेका बाबुरामको मूल स्वार्थ भनेको रास्वपामा प्रवेश गर्ने र त्यहीं पार्टीको सभापति हुने भन्ने हो । बाबुलाई थाहा छ कि, अहिलेनै रवि जेलमुक्त हुँदैनन् । त्यसैले रविलाई जेलबाट निकाल्नु पर्छ भनेकै भरमा बाबुराम रास्वपाका कार्यकर्ताको मन जित्न चाहन्छन् ।
रास्वपाभित्र पनि रवि लामिछानेपछिको उत्तराधिकारीको बारेमा विवाद छ । खासगरी स्वर्णिम वाग्ले र डिपी अर्यालबीच विवाद बढिरहेकै बेला बाबुरामले रास्वपाभित्र आफ्नो सुरक्षित स्थान खाजेका हुन् । रास्वपाको सभापतिमा कुलमान घिसिङलाई ल्याउने चर्चा चलिरहेकै बेला बाबुरामले रविको पक्ष लिनुलाई महत्वपूर्ण ढंगमा बुझिएको छ । यसरी सकेसम्म रास्वपा छिरेर रास्वपाकै सभापति हुने र नसकेपछि गोरखाबाट छोरी मानुषी यमीलाई सांसद उठाएर जिताउने वा समानुपातिक सूचीको माथिनै छोरीको नाम राख्ने योजनामा छन् ।
कतिपयलाई बाबुराम भट्टराईले देश र जनताप्रति उत्तरदायी भएर वैकल्पिक राजनीतिक दलको रुपमा रास्वपालाई स्वीकारेको भन्ने लाग्नसक्छ । तर बाबुराम स्वार्थ देशहीत र नागरिकको पक्षमा भन्दा पनि आफ्नै र आफ्नै पारिवारिक विरासतको रक्षामा केन्द्रित छ । हुनत रास्वपा छिरेर बाबुरामले सजिलै सभापति पाउने होइनन् । यो कुरा उनलाई पनि राम्रैसँग थाहा छ । तर, अबको राजनीतिलाई कता मोड्ने भन्ने चिन्ताले बाबुलाई यो मोडमा ल्याइपुर्याएको हो ।
