काठमाडौं । २४ घण्टामै देशको सत्ता फेर्न सफल भएको जेन जी आन्दोलनको जश–अपजश कसले लिने भन्नेमा लफडा देखिएको छ । यतिसम्म कि, आन्दोलनको जश लिन दर्जनौं समूहको होडबाजी छ भने भने अपजश लिन कोही पनि तयार छैनन् । ‘झटारो जहाँ लाग्यो, त्यहीं निसानी’ भन्ने शैलीमा भएको जेन जी आन्दोलनका कारण मुलुकमा थुप्रैखाले परिवर्तन भए ।
तर बिडम्बना, त्यहीं आन्दोलन गरेको भनिएको समूहबीच नै चरम लफडा देखिएको छ । जेनजी जनआन्दोलनको म्यान्डेट संस्थागत गर्न राष्ट्रपतिसँग वार्ता गर्ने भन्दै घोषणा भएको ११ सदस्यीय टोली भित्रनै लफडा भएको हो । सरकारसँग आफ्ना मागहरू तत्काल पूरा गर्न माग गर्दै हिजो मिराज ढुङ्गाना, पुरुषोत्तम यादव, प्रवेश दाहाल, कासिफ मिया खान, लगायतका सदस्यहरूको एउटा टोली उनीहरूले बनाएका थिए ।
उक्त टोलीकै सदस्य रहेकी रक्षा बमले भने आफ्नो त्यसमा समर्थन नगरेको प्रस्ट पारेकी छन् । सामाजिक सञ्जाल फेसबुकमार्फत उनले थाहा नै नदिई ,एकतर्फी ढङ्गले आफ्नो नाम वार्ता टोलीमा राखेको भन्दै असहमति जनाएकी हुन्। आन्दोलनको रापतापमा आफ्नो रोटी सेक्न खोज्ने फरक फरक अनुहार र समूहहरू पनि जन्मिइरहेको भन्दै त्यो निकै नै गम्भीर र दुखद कुरा रहेको उनको भनाइ छ ।
यसमा सबै चनाखो र सचेत हुनु जरुरी रहेको उनी बताउँछिन् । त्यस्तै यता अर्को तीन समूहले भने जेन जी आन्दोलनको वार्ता टोलीलाई बहिष्कार गर्ने निर्णय गरेका छन् । समूहकाअनुसार वार्तामा संलग्न केही व्यक्तिहरू अघिल्लो पटकमा संघीयता, गणतन्त्र र लोकतन्त्रविरोधी अभिव्यक्तिहरू दिँदै आएका छन्, जसका कारण उनीहरूप्रति विश्वास नरहेको जनाइएको छ ।
साथै, यही असोज ८ र ९ गतेको बैठकमा शान्ति सुरक्षाका सन्दर्भमा असहज र अपारदर्शी ढंगले कार्य भएको भन्दै समावेशी सहभागिता सुनिश्चित नगरेको ती समूहले बताएका छन् । यता नेपाली सेनासँगै भारतलके आधिकारिक मानेको सुदन गुरुङलाई भने जेन जी समूहले आफ्नो प्रतिनिधिका रुपमा स्वीकार गरेको छैन ।
उता सुदन भने यो देशको संविधान राख्ने कि फाल्ने, मन्त्री कसलाई बनाउने ? भन्ने तनावमा छन् । यसरी ठूलो उपलब्धीको सम्भावना हुँदाहुँदै पनि जेन जी समूहको निश्चित नीति र नेतृत्व नहुँदा आन्दोलन नै तुहिने सम्भावना बढेको छ ।
