अध्यादेशमार्फत निर्वाचन प्रणाली फेर्ने तयारी, जेन–जीसँगै विदेशमा हुने नेपालीले पनि भोट हाल्ने पाउने

काठमाडौं । सरकारले अध्यादेशमार्फत निर्वाचन कानून संशोधन गरेर नयाँ मतदाता नामावली संकलन गर्ने भएको छ । गृहमन्त्री ओमप्रकाश अर्यालले निर्वाचन आयोगसँगको छलफलमा यसका लागि सहयोगसमेत मागेका छन् ।

छलफलमा गृहमन्त्री अर्यालले जेनजीहरूको विद्रोहबाट नयाँ सरकार र नयाँ निर्वाचनको अवस्था सिर्जना भएको भन्दै उनीहरूलाई बाहिर राखेर निर्वाचन गर्न नसकिने बताएका हुन् । उनले १८ वर्ष उमेर पुगेका र मतदाता नामावलीमा नरहेका जेनजीहरूको माग बमोजिम उनीहरूको मतदानको अधिकार सुनिश्चित गर्न आवश्यक कानून संशोधन आवश्यक रहेको बताए ।

त्यस्तै सरकारले विदेशमा रहेका नेपालीले पनि मतदान गर्न पाउने गरी अध्यादेश ल्याउने तयारी गरेको छ । यसप्रति आयोग पनि सकारात्मक रहेको बताइएको छ । यससँगै सरकारले प्रत्यक्ष निर्वाचित कार्यकारी प्रमुखको व्यवस्थाका लागि पनि कसरत गर्ने जनाइएको छ ।