काठमाडौं । जेनजीले वार्ता गर्न ६ बुँदे माग अघि सारेको छ । राष्ट्रपति रामचन्द्र पौडेल र नेपाली सेनाले वार्तामा आह्वान गरेपछि जेनजीले ६ बुँदे माग अघि सारेका हुन् । जसअनुसार तत्कालै गर्नुपर्ने भनेर शर्तको रुपमा विगत तीन दशकमा लुटिएको सम्पति छानबिन गरी अवैध सम्पत्ति राष्ट्रियकरण गर्नुपर्ने माग राखिएको छ ।
यस्तै शिक्षा, स्वास्थ्य, न्याय, सुरक्षा र सञ्चारजस्ता पाँचवटा मूलभूत संस्थाको संरचनागत सुधार र पुनगठन गर्नुपर्ने माग अघि सारिएको छ । यसैगरी उनीहरुले वर्तमान राजनीतिक शून्यता र अस्थिरतालाई व्यवस्थापन गर्न जेनजी पुस्ताको नेतृत्वमा अन्तरिम सरकार गठन गर्नुपर्ने, सम्पूर्ण हिंसात्मक गतिविधि रोक्ने, नागरिक सुरक्षाका ग्यारेन्टी गर्ने र राष्ट्रिय एकताको वातावरण सिर्जना गर्ने कार्य अन्तरिम सरकारको पहिलो प्राथमिकता हुने मागको रुपमा अघि सारिएको छ ।
त्यस्तै जेन जीले वार्ताका लागि १० जना प्रतिनिधिलाई तयार गरेको छ । बुझिएअनुसार युजन राजभण्डारी, प्रदीप ज्ञवाली, रक्ष बम, रिजन रानामगर, अनुषा खनाल, निरज गौतम, सुश्मिता क्षेत्री, आकृति घिमिरे, सुयशा शाक्य र मोनिषा चौधरीलाई जेन जीले वार्ताका लागि प्रतिनिधि बनाएको हो ।
