काठमाडौं । पूर्वराष्ट्रपति विद्या भण्डारी पुनः राजनीतिमा सक्रि हुन लागेसँगै राजनीतिक वृत्त नराम्ररी गर्माएको छ । राजनीतिमा भण्डारीको पुनरागमनलाई कतिपयले अपरिहार्य भनेका छन् भने कतिपयले अस्वभाविक भनेर तर्क गरिरहेका छन् ।
बाहिर जे जे भए पनि एमालेभित्र यसले अनपेक्षित तरंग ल्याएको छ । यससँगै नेपालमा वामएकताको झ्याली पिट्नेहरुले पनि भण्डारीको राजनीतिक पुनरागमनलाई स्वर्णिम सम्भावनाका रुपमा लिएका छन् । यतिसम्म कि, एकाथरीले त भण्डारीलाई माओवादी अध्यक्ष पुष्पकमल दाहाल ‘प्रचण्ड’ले प्रयोग गरेको अर्थमा समेत बुझेका छन् ।
यसअघि माधवकुमार नेपाललाई प्रयोग गरेर एमाले कब्जा गर्ने रणनीति असफल भएपछि प्रचण्डले अपनाएको दोस्रो ट्याक्टिसका रुपमा पनि यसलाई हेरिएको छ ।
भण्डारीलाई एमालेको नेतृत्वमा पुर्याउने, वामएकताको नाममा माओवादी–एकीकृत समाजवादीसँग एकता गराउने, एकतापछि त्यसको नेतृत्व प्रचण्डले गर्ने रणनीतिका साथ अहिलेका गतिविधि भइरहेको आकलन पनि गरिएको छ । यी सबै अनुमानहरु सत्य नहुन सक्छन् । तर, विद्या भण्डारीको पुनरागमनले एमालेमा तनाव बढेको चाहिँ सत्य हो ।
भण्डारीको त्रासकै कारण एमालेले विधानबाट ७० वर्षे उमेर हद र दुई कार्यकाल मात्रै अध्यक्ष हुन पाउने व्यवस्था नै परिवर्तन गर्दैछ । अर्थात्, एक खेमाका नेताहरुले ओलीलाई नै फेरि अध्यक्ष बनाउन खोजिरहेका छन् ।
अहिले बुझिएअनुसार भण्डारीका पक्षमा नेताहरु वरिष्ठ उपाध्यक्ष ईश्वर पोखरेल, उपाध्यक्षद्वय युवराज ज्ञवाली र सुरेन्द्र पाण्डे, सचिवद्वय गोकर्ण बिष्ट र रघुवीर महासेठ खुलेर लागेका छन् ।
त्यसैगरी अध्यक्ष ओलीका पक्षमा उपाध्यक्ष रामबहादुर थापा, महासचिव शंकर पोखरेल, उपमहासचिवद्वय प्रदीप ज्ञवाली र विष्णु रिमाल, सचिवहरू लेखराज भट्ट र पद्माकुमारी अर्यालहरु लागेका छन् ।
उपाध्यक्षहरू अष्टलक्ष्मी शाक्य, विष्णु पौडेल र गुरु बराल तटस्थ जस्तै छन् । उपमहासचिव पृथ्वीसुब्बा गुरुङसँगै सचिवहरू योगेश भट्टराई र छविलाल विश्वकर्माले प्रष्टसँग मुख खोलेका छैनन् ।
त्यस्तै भण्डारीको पक्षमा पोलिट्युवरो सदस्यहरु युवराज ज्ञवाली, कर्ण थापा, गोकुल बाास्कोटा, आनन्द पोखरेल, सीता पौडेल, पुरुषोत्तम पौडेल र अरुण नेपाल खुलेका छन् भने ओलीको पक्षमा प्रदीप ज्ञवाली, विष्णु रिमाल, महेश बस्नेत र सूर्य थापालगायत छन् ।
यसरी पार्टी अध्यक्ष ओली र भण्डारीको पक्ष–विपक्षमा नेताहरु कित्ताकाट हुँदा कार्यकर्ता भने निराश भएका छन् ।
०००
