काठमाडौं । पूर्वराष्ट्रपति विद्यादेवी भण्डारी राजनीतिमा कमब्याक हुने घोषणासँगै एमालेमा खैलाबैला मच्चिएको छ । खासगरी ओलीइतरका एमाले कार्यकर्ता नरम्ररी हौसिएका छन् । उनीहरु यस्तो सोचिरहेका छन् कि, अब बल्ल छहरी पायौं, एमाले नछाड्ने कारण भेटियो ।
एमालेका संस्थापनइतर मात्रै होइनन्, भण्डारी राजनीतिमा कमब्याक हुने घोषणाले माओवादी केन्द्रका अध्यक्ष प्रचण्ड र नेकपा एसका अध्यक्ष माधव नेपाल पनि हौसिएका छन् । उनीहरुको बुझाइमा अब बल्ल ओलीलाई साइड लगाउने मान्छे आए भन्ने छ । खासगरी एमालेभित्र पनि विद्या भण्डारीको साइडबाट वरिष्ठ उपाध्यक्ष ईश्वर पोखरेले कडा खेल खेलिरहेका छन् भने पार्टी अध्यक्ष ओलीको साइडबाट महासचिव शंकर पोखरेलले वकालत गरिरहेका छन् । अरु जे–जे भए पनि भण्डारीको घोषणाबाट ओली चिढिएका छन् ।
पछिल्लो समय पार्टी विधानले नै निर्दिष्ट गरेको ७० वर्षे उमेर हदको विपक्षमा अभिव्यक्ति दिँदै आएका ओलीले भण्डारीलाई आफ्नो भाग खोस्न आएको रुपमा बुझेका छन् । दुई कार्यकाल अध्यक्ष भइसकेका ओलीले तेस्रो कार्यकाल खान खोज्नु अस्वभाविक हो । तर, राष्ट्रपति भइसकेको मान्छे पार्टी राजनीतिमा झर्नु पनि गतिलो कदम होइन ।
कुरोको चुरो यो छ कि, विद्या भण्डारी राजनीतिमा फर्किदाँ प्रचण्ड–माधव किन मख्ख छन् ? उनीहरुले भण्डारीको कदमसँगै वामएकताको सम्भावना देखेका छन् । तर के त्यो सम्भावना छ ? विगतको पाठबाट झस्किनुपर्ने अवस्था छ । राजनीतिमा भण्डारीको पुनरागमनसँगै एमालेको पहिलो महिला पार्टी अध्यक्ष र पहिलो महिला प्रधानमन्त्रीको चर्चा हुन थालेको छ । लैंगिक कोणबाट हेर्दा ठिकै लागे पनि राष्ट्रपति भएकाहरु ओर्लिएर अरु पद खान थाल्नु राम्रो होइन । जे होस्, पुर्वराष्ट्रपति भण्डारीको पुनरागमनले नेपाली राजनीतिलाई तरंगित बनाएको छ ।
यसअघि पूर्वउपराष्ट्रपति नन्दबहादुर पुन पनि माओवादीको राजनीतिमा फर्किसकेका छन् । सरकारी सुविधा त्यागेर राजनीतिमा आउने कुरालाई राम्रै मान्न पनि सकिएला । तर, देशको मायाले भन्दा पनि आफ्नै लाभका लागि कोही व्यक्ति आउनु र जानुले केही फरक पर्दैन ।
