काठमाडौं । आफूलाई सिन्धुपाल्चोकको सरकार दाबी गर्ने नेता मोहन बस्नेतविरुद्ध अख्तियारमा भ्रष्टाचार मुद्दा दर्ता भएपछि सिन्धुपाल्चोको राजनीतिमा नयाँ तरंग उत्पन्न भएको छ ।
मुद्दा दर्तासँगै बस्नेतको सांसद पद नै निलम्बन भएपछि जिल्लामा अनेकखाले अड्कलबाजी हुन थालेका छन् । अरु चर्चा जे–जे भए पनि अब मुद्दा किनारा नलागुन्जेल बस्नेत सांसद हुने हुने छैनन् । र, मुख्य कुरा २०८४ सालअघि मुद्दा फैसला नभए वा उनको विपक्षमा फैसला भएमा बस्नेत यहाँ चुनाव लड्न पाउने छैनन् ।
बस्नेत चुनाव नलड्नेबित्तिकै यहाँको राजनीतिले नै अर्को मोड लिने स्थिति छ । यतिसम्म कि, यहाँ नेपाली कांग्रेसभित्रै बस्नेतको उत्तराधिकारी छैनन् । काजी शैलीमा रजगज गरिरहेका बस्नेत एक्कासी किनारा लाग्ने अवस्था आएपछि कांग्रेसको एउटा खेमामा खुसीयाली नै छाएको छ । तर, दुर्भाग्य उनको विकल्पको रुपमा आफूलाई उभ्याउन सक्ने कोही पनि नेता छैनन् । जसको फाइदा लिने दाउमा छन्, एमाले र माओवादी ।
विगतमा एमाले र कांग्रेससँग मिलेर चुनाव जितेको माओवादीले पनि बस्नेत मैदानमा नहुनुलाई सहज रुपमा लिनेछ भने कांग्रेससँग हाराहारीको शक्तिमा रहेको एमालेले पनि आगामी चुनाव आफ्नो जितका लागि सजिलो हुने आकलन गर्न थालेको छ ।
तर, एमालेभित्र बढ्दो चरम गुटबन्दीले नतिजालाई उल्ट्याउने सम्भावना पनि उत्तिकै छ । त्यतिबेला चुनाव लड्न नपाए पनि मोहन बस्नेतले निर्बाह गर्ने भूमिका महत्वपूर्ण हुन्छ ।
