गभर्नर नियुक्ति विवादले धरमरायो सरकार

काठमाडौं । गभर्नर नियुक्ति विवादले राजनीतिक वृत्तमा नयाँ तरंग ल्याएको छ । यतिसम्म कि यहीं विवादका कारण सरकार नै धरमराएको विश्लेषण हुन थालेको छ ।

गभर्नर नियुक्ति विवाद उत्कर्षमा पुगेका बेला सरकारको नेतृत्व गरिरहेको दल नेकपा एमाले र प्रमुख प्रतिपक्षी दल माओवादी केन्द्रका शीर्षस्थ नेताबीच सत्तासाझेदारीको विषयमा गम्भीर छलफल भएको बुझिएको छ ।

गभर्नर नियुक्तिका विषयमा सोमबार समेत प्रधानमन्त्री ओली र कांग्रेस सभापति शेरबहादुर देउवाबीच छलफल हुँदा समेत कसलाई नियुक्त गर्ने भन्ने विषयमा कुनै सहमति हुन सकेन । बरु यो छलफलमा दुई दलबीचको दरार झन् बढेको बुझिएको छ ।

प्रधानमन्त्री भारतसँग सम्बन्ध सुधार गर्न नसकेको कुराले पनि कांग्रेससँग बिच्किएका छन् । त्यस्तै माओवादी अध्यक्ष प्रचण्ड पनि फेरि वाम एकता हुनुपर्ने बताइरहेका छन् । यसरी सबैखाले परिस्थितिले अहिलेको सत्ता गठबन्धनमा गडबड आएको बुझ्न कठिन छैन ।