सीआईबीसँगको बयानमा धनराजले भने- सहकारीका कारण श्रीमतीसँगै सम्पत्ति र इज्जत पनि गुम्यो

काठमाडौं । नेपाली कांग्रेसका उपसभापति धनराज गुरुङले सहकारी प्रकरणमा आफूले पत्नीसँगै इज्जत र सम्पत्ति गुमाएको बताएका छन् । नेपाल प्रहरीको केन्द्रीय अनुसन्धान ब्युरो (सिआइबी) लाई ६ घण्टा लामो बयान दिँदै उनले आफूले गल्ती नगर्दा पनि पत्नीका कारण सबैथोक गुमाउनु परेको बयान दिएका हुन् ।

आफूले पत्नीसँग गरेको सम्बन्धविच्छेद नक्कली नभएको समेत उनले बताएका छन् । सिआइबीले गुरुङसँग बुधबार दिउँसो १२ बजेदेखि ५ बजेसम्म ६ घण्टा बयान लिएको थियो । सहकारीमा बचतकर्ताले राखेको रकम अपचलन भएकोबारे छानबिन गर्न गठित संसदीय विशेष समितिले पनि ‘ज्योति गुरुङ र धनराज गुरुङ’लाई कारबाही सिफारिस गरेको छ ।

सिफारिसका आधारमा गुरुङमाथि अनुसन्धान नभएको भन्दै आलोचना पनि भइरहेको थियो । धनराज गुरुङ र ज्योति गुरुङ पति–पत्नी भए पनि २९ फागुन २०७६ मा सम्बन्ध विच्छेद भएको थियो । सिआइबीले गुरुङलाई बुधबार मितेरी सहकारीको १४ करोड रुपैयाँ हिनामिनाको आरोपसम्बन्धी बयानमा कागज पनि गराएको छ ।