पाँच रुपैयाँ जरिवाना नतिर्दा १२ वर्षपछि पक्राउ

काठमाडौं । सप्तरीको बोदेवरसाइन–१० साविक खडगपुर–१ का शंकरकुमार यादवलाई आइतबार सप्तरी प्रहरीले पक्राउ गर्यो । आरोप थियो– अदालतले तोकेको पाँच रुपैयाँ जरिवाना नबुझाएको । यादवविरुद्ध परेको जालसाजी सम्बन्धी मुद्दामा २०६८ साल चैत १ गते सप्तरी अदालतले पाँच रुपैयाँ जरिवाना तोकेको थियो ।

तर उनले जरिवानाको सो रकम बुझाएका थिएनन् । उनले जरिवाना नतिरेका कारण प्रहरीले उनलाई फरार सूचीमा राखेको थियो । फरार सूचीमा रहेकै कारण आइतबार उनलाई पक्राउ गरी जिल्ला अदालतमा पेस गरिएको प्रहरीले जनाएको छ ।

त्यस्तै जालसाजी मुद्दामै अदालतले ८ रुपैयाँ ३३ पैसा जरिवाना तोकेपछि सो जरिवाना नबुझाई फरारी सूचीमा रहँदै आएका गम्हरिया–९ का देवनारायण शर्मालाई पनि प्रहरीले पक्राउ गरेको छ ।