सहकारी ठगीमा रविपत्नी निकिता पनि मुछिइन्, यस्तो छ कारण

काठमाडौं । सहकारी ठगी प्रकरणमा पूर्वगृहमन्त्री एवम् रास्वपा सभापति रवि लामिछानेमाथि प्रहरी अनुसन्धान भइरहेको छ । यसैबीच लामिछानेकी पत्नी निकिता पौडेल पनि सहकारी ठगीमा संलग्न भएको भन्दै विभिन्न सञ्चारमाध्यममा समाचार आइरहेका छन् ।

काठमाडौं महानगरपालिकाले गरेको एक अनुसन्धानलाई आधार बनाएर सञ्चारमाध्यमले लेखेका समाचारअनुसार निकिता पौडेलले सहकारीको ४ करोड ५९ लाख ५३ हजार २ सय ३२ रुपैयाँ अपचलन गरेकी छिन् ।

यसअघि पनि साई स्वागत बचत तथा ऋण सहकारी संस्थाको रकम अपचलनमा जोडिएपछि निकिता पौडेलले ‘उपाध्यक्ष पदबाट राजीनामा दिइसकेको र राजीनामासमेत स्वीकृत भएको’ तर्क गर्दै आफ्नो संलग्नता अस्वीकार गर्दै आएकी थिइन् । तर प्रतिवेदनले भने निकिता अझै पनि सहकारीको उपाध्यक्ष नै रहेको ठहर गरेको छ ।

सहकारीले बचत फिर्ता नगरेको भन्दै २०८० असार २ मा काठमाडौँ महानगरपालिकामा बचतकर्ताहरूले उजुरी दिएपछि भएको अनुसन्धानले सहकारीमा रहेको चार करोड बढी रकम अपचलन भएको खुल्यो । र, उक्त अपचलनमा निकिता समेत जिम्मेवार देखिइन् ।