काठमाडौं । अहिले भाटभटेनी डिपार्टमेन्ट स्टोरका सञ्चालक तथा व्यवसायी मीनबहादुर गुरुङले सत्तारुढ दल नेकपा एमालेको पार्टी कार्यालय बनाउन जग्गा दान दिएको विषयले राजनीति गर्माएको छ । विवादित व्यवसायी गुरुङले पार्टी कार्यालय भवनसमेत बनाइदिने भएपछि एमाले पार्टीभित्र र बाहिर नेतृत्वको चर्को आलोचना भइरहेको छ ।
पार्टीका उच्च तहका नेताहरू मौन रहे पनि कतिपय स्थायी कमिटी सदस्य तथा केन्द्रीय सदस्यहरूले विरोध जनाएका छन् । पार्टीका तल्लो तहका कार्यकर्ताले पनि यसलाई निको मानेका छैनन् । नक्कली भ्याट बिल प्रकरणमा राजस्व छली गरेको आरोपमा सर्वोच्च अदालतबाट सजाय तोकिएका व्यक्ति गुरुङले दिएको दान लिनु पार्टीका लागि घातक रहेको भन्दै नेतृत्वको आलोचना भइरहेको हो ।
एमालेले भने जग्गा दान र राजस्व ठगी अलग विषय भएको जनाएको छ । नक्कली भ्याट बिल प्रकरणमा सर्वोच्च अदालतले २०८० माघमा गुरुङलाई दोषी ठहर गरेको थियो । पार्टी कार्यालय शिलान्यास गर्नुअघि बसेको सचिवालय बैठकमा जग्गा प्राप्त हुने तर कसले दिने भन्ने खुलाइएको थिएन ।
असोज ११ र १२ गतेको बाढीका कारण एमाले पार्टी कार्यालय डुबानमा परेपछि व्यवसायी गुरुङले पार्टीको फर्निचर बनाइदिने प्रस्ताव गरेका थिए । तर पार्टी अध्यक्ष ओलीले त्यो कार्यालय आफ्नो नभएको बताएपछि जग्गासहित पार्टी कार्यालय नै बनाइदिने प्रस्ताव गुरुङले गरेका थिए । ओलीले पनि गुरुङको उक्त प्रस्ताव स्वीकार गरेका हुन् । एमाले नेताहरूका अनुसार व्यवसायी गुरुङले आगामी वर्षको घटस्थापनाका दिन भवन तथा जग्गा हस्तान्तरण हुने गरी निर्माणको तयारी थालेका छन् ।
यसकारण सरिरहन्छ एमाले पार्टी कार्यालय
२०७२ सालको भूकम्पले बल्खुमा रहेको पार्टी मुख्यालय क्षतिग्रस्त भएपछि एमाले भाडाको घरमा बस्दै आएको छ । यसअघि एमालेको पार्टी कार्यालय धुम्बाराहीस्थित पासाङ ल्हामु स्मृति प्रतिष्ठानको भवनमा बसेको थियो । सरकारले प्रतिष्ठानलाई भोगाधिकार दिएको जग्गा एमालेलाई भाडामा लगाइएको भन्दै विरोध भएपछि त्यहाँबाट थापाथली हाइट सरेको थियो ।
थापाथलीमा एमाले व्यापारी सञ्जय अग्रवालको घरमा भाडामा बसेको थियो । अहिले पनि त्यहाँ एमालेको उद्योग विभाग छ । केन्द्रीय कार्यालय त्यहाँबाट पनि सारेर २०७९ वैशाख ९ गते ललितपुर च्यासलस्थित तुलसीलाल स्मृति प्रतिष्ठानमा राखिएको छ । तुलसीलाल स्मृति प्रतिष्ठानको भवन एमालेले पाँच वर्षका लागि भाडामा लिएको हो । यद्यपि यो पनि सरकारले प्रतिष्ठानलाई भोगाधिकार दिएको जग्गा हो । प्रतिष्ठानले एमालेलाई भोगचलन दिएको भन्दै त्यहाँ पनि आलोचना भएको थियो । भूकम्पले भत्काएको बल्खुको भवन एमालेले २०५१ सालमा बनाएको हो ।
गुरुङ चोख्याउँदै ओली
विवाद बढेपछि एमालेले गुरुङलाई चोख्याउने प्रयास गरिरहेको छ । एमालेले गुरुङ पार्टीको पुरानो कार्यकर्ता, समर्थक र शुभचिन्तक भएको दाबीसमेत गरेको छ । विद्यार्थीकालदेखि धरानमा अध्ययन गर्दा अनेरास्ववियु र स्ववियुको सक्रिय कार्यकर्ता रहेको र नोकरीका सिलसिलामा नेपाल बैंक लिमिटेडमा कार्यरत रहँदा बैकिङ सेक्टरको केन्द्रीय कार्यसमिति सदस्य भई काम गरेका गुरुङले अन्तरसंस्थानको केन्द्रीय कोषाध्यक्ष भई ट्रेड युनियन आन्दोलनमा भूमिका निर्वाह गरेको एमालेको भनाइ छ ।
एमालेले भनेको छ– ‘नेपाली माटोमा हुर्किएका एक सफल व्यवसायी एवं लोकतन्त्रवादी व्यक्तित्व हाम्रो पार्टीका समर्थक, शुभचिन्तक मीनबहादुर गुरुङ र उहाँकी धर्मपत्नी सावित्री गुरुङबाट कीर्तिपुर नगरपालिका वडा नं. २ मैत्रीनगरस्थित १० रोपनी १४ आना जग्गा निःशुल्क दान गरी पार्टी केन्द्रीय कार्यालय भवन निर्माण गर्न सहयोग गर्नुभएको छ । यसलाई २०८१ असोज २४ गते बसेको सचिवालयको ३८ औं बैठकले संस्थागत रूपमा स्वीकार गरी उहाँलाई सहयोगका निम्ति धन्यवाद दिएको छ ।’
को हुन् मीनबहादुर ?
अहिले नेपालको व्यावसायिक क्षेत्रमा गुरुङ स्थापित व्यक्ति हुन् । उनको व्यावसायिक यात्रालाई उदाहरणीय पनि मान्नेहरु धेरै छन् । उनले आफ्नै बलबुतामा स्थापना गरेको भाटभटेनी देशकै प्रमुख किनमेल केन्द्र बनेको छ । सन् १९५८ मा खोटाङमा जन्मिएका गुरुङका बुवा कृषक थिए । जन्मस्थलबाट काठमाण्डू आएर गुरुङले सुरुमा दैनिक ज्यालामा काम गर्ने कामदारहरूको हाजिरको विवरण राख्ने गरेको बताइन्छ ।
विगतमा उनले नेपाल ब्याङ्क लिमिटेडमा काम गरेका थिए । काम गर्दै उनले अर्थशास्त्रमा स्नातकोतर तहको अध्ययन पनि सम्पन्न गरेका थिए । गुरुङमाथि तात्कालिक माओवादी नेताहरूको लगानी परिचालन गरेको आरोप पनि लाग्ने गरेको छ । र, पछिल्लो समय उनी विवादित ललितानिवास प्रकरणमा मुछिएका छन् ।
कांग्रेस केन्द्रीय कार्यालय पनि दान गरेकै जग्गामा
अहिले एमालेको पार्टी कार्यालय बनाउन व्यवसायी गुरुङले जग्गा दान दिएको विषय निकै विवादित बनिरहेको छ । यसैबीच सत्तारुढ अर्को दल नेपाली कांग्रेसको पार्टी कार्यालय पनि दाताले दान दिएकै जग्गामा बनाएको खुलेको छ । अहिले सानेपामा भएको कांग्रेसको पार्टी कार्यालय बनेको जग्गा मैयाँदेवी श्रेष्ठले निशुल्क दिएकी हुन् । यद्यपि, उनी विवादित पात्र होइनन् । र उनी अहिले संसारमा छैनन् । तर, नेपाली कांग्रेसका प्रवक्ता विश्वप्रकाश शर्माले भने उक्त जग्गा कांग्रेसले नै किनेको दाबी गरेका छन् ।
