जुगल पहिरो अपडेटः बेपत्ता भनिएका ७ जना सम्पर्कमा आए

काठमाडौं । सिन्धुपाल्चोकको जुगल गाउँपालिकाको वडा नम्बर ३ स्थित तेगागाउँमा पहिरोले घर बगाउँदा बेपत्ता भएका भनिएका सातै सम्पर्कमा आएका छन् । जिल्ला प्रहरी कार्यालय सिन्धुपाल्चोकका प्रहरी प्रमुख एसपी सन्तोष खड्काले सोमबार बिहानै तेगामा पुगेर उद्धार गरिएको बताए ।

माथिल्लो तेगाको भूभाग भास्सिएर आएको पहिरोले तेतागाउँको नौ घरमध्ये तीन घरमा पुर्ण रुपमा क्षति पुगेको छ । पहिरोमा स्थानीय लाक्पा शेर्पा, मिङ्मार रिन्जेन शेर्पार पेम्बा शेर्पाको घर पूर्ण रूमा क्षति भएको छ ।

हाल गाँउका स्थानीयको उद्धार गरेर सुरक्षित स्थानमा लैजाने काम भइरहेको छ । केही समयअघि यहाँ निर्माणाधीन जलविद्युत् आयोजनाद्वारा तेम्बाथानसम्म सडक छिचोलिए पनि ठाँउपिच्छै पहिरो र खोलाले अवरुद्ध बनाएकाले बर्खायता सडक ठप्प छ ।

जुगल गाउँपालिका अध्यक्ष रेशम स्याङ्म्बोका अनुसार शनिबार खबर पाएलगत्तै उद्धारका लागि सुरक्षाकर्मी दुई दिन पैदल हिँडेर सोमबार पुगेका हुन् ।