सहकारीको रकम पचाउन नक्कली सम्बन्धविच्छेद, बेलायत जान फेरि विवाहको नाटक

काठमाडौं । एक जोडीले सहकारीको रकम पचाउन नक्कली डिभोर्स गरेको र विदेश जानका लागि फेरि विवाहको नाटक गरेको खुलेको छ ।

ललितपुरको पुल्चोकस्थित सुमेरु बचत तथा ऋण सहकारी संस्था लिमिटेडका सञ्चालक भरत महर्जन र राजमाया महर्जन दम्पतीले ठगी रकम अपचलन गर्नका लागि सम्बन्धविच्छेद गरेको पाइएको हो ।

सम्बन्धविच्छेद गरिसकेपछि उनीहरुले बेलायत पलायन हुन पुनः विवाह समेत गरेको खुलेको छ । सहकारी संस्था बचत रकम दुरुपयोगसम्बन्धमा गठित संसदीय छानबिन विशेष समितिले महर्जन जोडीको यो रहस्य सार्वजनिक गरेको हो ।

२०५६ साउन ४ गते सुमेरु बचत तथा ऋण सहकारी संस्था ललितपुरमा दर्ता भएर सञ्चालनमा आएको थियो । उक्त सहकारी स्थापनादेखि नै भरत महर्जनको नेतृत्वमा सञ्चालनमा थियो । अहिले महर्जनको सपरिवार बेलायत बस्छन् ।