काठमाडौं । एमालेसँग चोइटिएर बनेको नेकपा एसभित्र झन्पछि झन् विवाद बढ्दो छ । पार्टी स्थापनादेखिनै सुरु भएको विवाद भर्खरै सकिएको अधिवेशनपछि त उत्कर्षमै पुगेको छ । अधिवेशनले चुनेको नेतृत्वप्रति असन्तुष्टि जनाउँदै नेकपा एसका थुप्रै नेताले पार्टी छाडेको घोषणा गरिसकेका छन् ।
काठमाडौं जिल्ला कमिटी उपाध्यक्ष बटुकृष्ण थापा र सचिव धुर्वराज न्यौपानेसँगै काठमाडौँ क्षेत्र नम्बर ७ का संयोजक तथा युवा फाँट इन्चार्ज हरिशरण घिमिरे, जिल्ला कमिटी सचिव तथा तारकेश्वर नगर कमिटी सचिव शिवहरि देवकोटा, कीर्तिपुर नगर कमिटी अध्यक्षरोहित महर्जन, सचिव गृश्म महर्जन, उपसचिव नारायणहरी थापा, जिल्ला सचिवालय सदस्य सुशीला खतिवडा, राजकुमार महर्जन, विजय देवकोटालगायतले पार्टी जिम्मेवारीबाट राजीनामानै दिइसकेका छन् ।
यससँगै देशका विभिन्न जिल्लाका नेताहरुले पनि नेकपा एस छाडेको घोषणा गरिरहेका छन् । नेकपा एसभित्र अहिले चुनाव हारेका नेताहरु मात्र होइनन्, यसअघि केन्द्रीय सदस्यमा नपरेकाहरु पनि असन्तुष्ट छन् । एकीकृत समाजवादीले निर्वाचनमार्फत १७ पदाधिकारी र १०५ जना पोलिटब्युरो सदस्य चयन गरेको हो ।
यसअघिको महाधिवेशनबाट अध्यक्षमा माधव नेपाल, सम्मानित नेतामा झलनाथ खनाल र महासचिवमा घनश्याम भुषाल चयन भए पनि बाँकी पदाधिकारी र पोलिटब्युरो सदस्य चयन हुन सकेको थिएन । अध्यक्ष नेपाल पक्षले पदाधिकारीमा जिताउनुपर्ने नेताहरूको नामावली बाँड्दा उनकै समूहकी रामकुमारी झाँक्री उपाध्यक्षमा हारेकी छन् ।
त्यति मात्र होइन, माधव नेपाल पक्षको चिटमा डा विजयकुमार पौडेल र प्रकाश ज्वालालाई हटाएको थियो । पदाधिकारीमा झलनाथ खनाल र घनश्याम भुषाल समूहका प्रकाश ज्वालाबाहेक कोही पनि परेका छैनन् । नेकपा एसभित्रको अन्तरसंघर्ष र गुटगत राजनीतिका कारण अहिले पार्टी नै संकटमा परेको छ ।
