कोटेश्वरमा खाजाघरको नाममा वेश्यावृत्ति, पाँच बालिका र एक युवतीको उद्दार

काठमाडौं । कोटेश्वरको एक गेस्ट हाउसमा वेश्यावृत्ति गराउने गराइएको खुलासा भएको छ । कोटेश्वरस्थित ‘कमलामाई खाजाघर एन्ड गेस्ट हाउस’बाट प्रहरीको मानव बेचबिखन ब्युरोले वेश्यावृत्तिमा लगाएका ५ जना बालिका र युवतीलाई उद्धार गरेसँगै उक्त खुलासा भएको हो ।

उद्धार गरिएकामध्ये दुईजना १५ र १६ वर्षका छन् । गेस्ट हाउस सञ्चालक रामेछाप घर भएका गोरे नेवा खड्गीले रकम असुलेर उनीहरूलाई यौन व्यवसायमा लगाएका हुन् । प्रहरीले गेस्ट हाउस सञ्चालक खड्गी र गेस्ट हाउसमा यौन धन्दा चलाउन ग्राहक खोज्ने सिन्धुलीका राजु साहीलाई पक्राउ गरेको हो ।

उद्धार गरिएका ३ जना युवतीहरू १८ वर्ष माथिका छन् । वेश्यावृत्ति गर्न बाध्य पारिएकाहरू सिन्धुपाल्चोक, काभ्रे र उदयपुरका हुन् । गेस्टहाउसमा आउने ग्राहकहरूसँग सञ्चालकले एकपटकको शारीरिक सम्पर्कका लागि १ हजार ५ सय र रातभरका लागि ८ हजार रुपैपाँ असुल्ने गरेको पाइएको प्रहरीले जनाएको छ ।