काठमाडौं । सञ्चालनमा रहेका २० वाणिज्य बैंकहरु ६४ अर्बमाथिको नाफामा देखिएका छन् । वाणिज्य बैंकहरूले सार्वजनिक गरेको अपरिष्कृत वित्तीय विवरणअनुसार आर्थिक वर्ष २०८०/०८१ मा बैंकहरु ६४ अर्ब १५ करोड ३० लाख रुपैयाँको नाफामा देखिएका हुन् । आव २०७९/८० मा वाणिज्य बैंकहरुले ५६ अर्ब ५७ करोड ४४ लाख रुपैयाँ खुद नाफा आर्जन गरेका थिए ।
विवरण अनुसार आव २०७९/८० को तुलनामा १० वाणिज्य बैंकहरुको नाफा २०८०/०८१ मा वृद्धि भएको छ भने १० बैंकहरुको नाफामा गिरावट आएको छ । यसमध्ये असार मसान्तसम्ममा सबैभन्दा बढी नाफा नबिल बैंकले आर्जन गरेको छ । समीक्षा अवधिमा नबिलले ७ अर्ब ६ करोड रुपैयाँ खुद नाफा कमाएको छ । आर्थिक वर्ष २०७९र८० मा भने नबिल बैंकले ६ अर्ब ४० करोड नाफा आर्जन गरेको थियो ।
असार मसान्तसम्ममा नाफा आर्जन गर्ने अर्को बैंक नेपाल इन्भेष्टमेन्ट मेगा हो । यस बैंकले ५ अर्ब १९ लाख नाफा आर्जन गरेको छ । आव २०७९/८० मा नेपाल इन्भेष्टमेन्ट मेगाले ३ अर्ब ७२ करोड नाफा आर्जन गरेको थियो ।
यस्तै प्रभु बैंकले ४ अर्ब ४८ करोड ८ लाख, कुमारी बैंकले २ अर्ब ३० करोड ८२ लाख, प्राइम कमर्सियल बैंकले ३ अर्ब ७७ करोड ४३ लाख, कृषि विकास बैंकले ३ अर्ब ६५ करोड ५६ लाख, एभरेष्ट बैंक ३ अर्ब ७० करोड ६ लाख, राष्ट्रिय वाणिज्य बैंकले ३ अर्ब ४९ करोड ८२ लाख, स्टान्डर्ड चार्टर्ड बैंकले ३ अर्ब ३० करोड ८९ लाख र लक्ष्मी सनराइज बैंकले ३ अर्ब ३ करोड ४५ लाख खुद नाफा आर्जन गरेको छ ।
आव २०७९/८० मा यी बैकहरुले क्रमशः ४ अर्ब ४८ करोड, ५१ करोड ७९ लाख, १ अर्ब २ करोड ७८ लाख, १ अर्ब ३२ करोड ३४ लाख, ३अर्ब ३६ करोड, ३ अर्ब ५९ करोड, ३ अर्ब ४६ करोड र २ अर्ब २८ करोड नाफा आर्जन गरेका थिए ।
