काठमाडौं । नेपाल एसोसिएसन अफ टुर एन्ड ट्राभल एजेन्ट्स (नाट्टा)की महासचिव युविका भण्डारी नेपाल उद्योग वाणिज्य महासंघ (एफएनसीसीआई) अन्तर्गतको महिला उद्यमशीलता विकास समितिको सदस्यमा नियुक्त भएकी छन्।
नियुक्तिपछि भण्डारीले आफूलाई जिम्मेवारी प्रदान गरेकोमा एफएनसीसीआईका अध्यक्ष अञ्जन श्रेष्ठ, वरिष्ठ उपाध्यक्ष सुरकृष्ण वैद्य, वस्तुगततर्फका उपाध्यक्ष नरेशलाल श्रेष्ठ तथा एफएनसीसीआईकी कार्यकारिणी सदस्य एवं महिला उद्यमशीलता विकास समितिकी सभापति सुनिता न्यौपानेप्रति आभार व्यक्त गरेकी छन्। उनले भनिन्, ‘मप्रति देखाउनुभएको विश्वास र भरोसाका लागि सम्पूर्ण नेतृत्वप्रति हार्दिक कृतज्ञता व्यक्त गर्दछु ।’
नाट्टाको महासचिवका रूपमा पर्यटन क्षेत्रको संस्थागत विकास, नीति संवाद तथा व्यवसायीहरूको हितमा सक्रिय रहँदै आएकी भण्डारीले नयाँ जिम्मेवारीमार्फत महिला नेतृत्वमा सञ्चालित उद्यमहरूको प्रवर्द्धन, महिला उद्यमीहरूको क्षमता अभिवृद्धि तथा उद्यमशीलताको वातावरण सुदृढ बनाउन योगदान दिने प्रतिबद्धता व्यक्त गरेकी छन्।
उनले समितिका अन्य सदस्यहरूसँग सहकार्य गर्दै महिला उद्यमलाई थप प्रतिस्पर्धी, दिगो र प्रभावकारी बनाउने तथा नेपालको आर्थिक विकासमा अर्थपूर्ण योगदान पुर्याउने विश्वाससमेत व्यक्त गरेकी छन्।
