काठमाडौं । चुनावी परिणाम आइनसक्दै नयाँ मन्त्रिमण्डल गठनको विषयमा किचलो सुरु भएको छ । खासगरी रास्वपामा पछि आएर मिसिएको बालेन समूह र पुराना रास्वपा समूहबीच नयाँ सरकार गठनका विषयमा मत बाझिएको हो । बालेन समूहले चहिरहेको छ कि, अबको सरकार प्रधानमन्त्री बालेनकै चाहनाबमोजिम बनोस् । जुन कुरालाई बालेनका अतिप्रिय मित्र तथा यसअघिका सांसद असिम साहले स्पष्टसँग फेसबुकमा लेखेका छन् ।
रवि लामिछाने र बालेन शाह मिलाउन निर्णायक वार्ता भएको घरका घरबेटीसमेत रहेका शाहले बालेनकै मर्जीमा सरकार बनाउने भएकाले कसैलाई भनसुन नगर्नसमेत सुझाएका छन् । रास्वपा उपसभापति डिपी अर्यालले बालेनलाई प्रधानमन्त्री बनाउनका लागि भएको सहमतिबारे आफूलाई थाहा नभएको बताएलगत्तै साहले सामाजिक सञ्जालमार्फत यस्तो धारणा सार्वजनिक गरेका हुन् । साहको उक्त धारणा व्यक्तिगत नभएर बालेन समूहकै भएको बुझ्न कठिन छैन ।
साहले फेसबुकमा लेखेका छन्, ‘मन्त्री बन्न दौडधुप गर्न, भनसुन गर्न, मिडिया ट्रायल गर्न वा प्रचार गर्न आवश्यक छैन, केही नगरे पनि हुन्छ, जब बालेन प्रधानमन्त्रीका रूपमा नियुक्त हुनुहुन्छ, उहाँले आफ्नो क्याबिनेटको टिम आफैं छनोट गरेर बनाउनुहुनेछ, उहाँलाई सबै सांसदहरूको योग्यता र क्षमताबारे राम्रो जानकारी छ ।’
यसरी साहले सार्वजनिक गरेको धारणाले रास्वपाभित्र नयाँ तरंग उत्पन्न गरेको छ । यससँगै बालेनलाई प्रधानमन्त्री बनाउन रास्वपाको विधान नै बाधक बन्नसक्ने टिप्पणी पनि हुन थालेको छ । हुन पनि हो, रास्वपाको विधानले सजिलै बालेनलाई संसदीय दलको नेता बन्न नदिने देखिएको हो ।
रास्वपा विधान– २०७९ को धारा ७२ का अनुसार पार्टीबाट निर्वाचित सांसदहरुले संसदीय दलको नेताका लागि उम्मेदवारी दिनेछन् र देशभरका साधारण सदस्यले मतदान गरी बहुमत दिएपछि मात्रै उक्त सांसद संसदीय दलको नेता बन्न सक्नेछन् । यदि तीन वा तीनभन्दा बढी उम्मेदवार भएर कसैले पनि बहुमत ल्याएनन् भने धेरै मत ल्याउने सांसदबीच फेरि चुनाव चुनाव गर्नुपर्ने रास्वपाको विधानमा उल्लेख छ । संसदीय दलको नेता नभइ प्रधानमन्त्री हुन पाइँदैन ।
