काठमाडौं । रवि, बालेन र कुलमानबीच एकता भएको भनिएकै दिन राजनीतिक क्षेत्रका जानकारहरुले भनेका थिए– यो एकता कुनै हालतमा टिक्दैन । किनकि यो नितान्त व्यक्तिगत स्वार्थको जगमा भएको छ । अर्थात कतिपयले भने– यो अरु कसैले मिलाइदिएका हुन्, अरुले मिलाइदिएको एकता टिक्नै सक्दैन ।
हुन पनि हो– न राजीतिक विचारधार, न नीति तथा एजेण्डा, न कुनै संगठन, न त कुनै कार्यक्रम नै ! ‘पुराना दललाई देखाइदिने’ भन्दा अरु कुनै उद्देश्य नभएको उक्त एकता नटिक्ने त निश्चित नै थियो । धेरैको अनुमान थियो, चुनावपछि भागबण्डा मिल्दैन र उनीहरुबीच फाटो आउँछ ।
तर, त्यतिबेलासम्म पनि उक्त एकता टिकेन । अर्थात १२ दिनमै भाँडियो । रास्वपामा मिसिएको उज्यालो नेपाल पार्टी बाहिरियो । अहिले दुवै पक्षले एकअर्कालाई दोष लगाइरहेका छन् । जसले जे पनि उक्त एकता नटिक्नुको एकमात्र कारण हो– पदको भागबण्डा ! कुलमानले रास्वपासँगको एकता भाँडिएको घोषणा गरेसँगै एकाथरीले भन्न थालेका छन्– रविको नियतै कुलमानसँगै उज्यालो नेपाललाई सिध्याउने थियो ।
र अब उनले बालेनलाई सिध्याउने रणनीति अपनाएका छन् । रविका विरोधीहरुले त यतिसम्म भनेका छन् कि, रविले जहाँ जहाँ हात हाल्छन् त्यहाँ चौपट बनाएर छाड्छन् । आफ्नै घर होस् कि ग्यालेक्सी टिभी वा सहकारीहरु ! उनले हात हालेपछि त्यसलाई सिध्याएर आफू हिरो भएर निस्कन्छन् । हुन पनि घटनाक्रमले उक्त विश्लेषणलाई पुष्टि गर्दै गएको छ ।
बालेनका समर्थकको भोट रास्वपाका लागि ल्याउनका लागि रविले बालेनलाई भावी प्रधानमन्त्री मन्दिएका छन् । बालेनले पत्याएका पनि छन् । बालेनको इन्ट्रीले अहिले रास्वपाभित्र पनि खुसी भने छाएको छैन । बालेनसँग कुनै टिम नभएको र वडा सदस्यको हैसियत पनि नभएकालाई केन्द्रीय सदस्यका लागि पठाएको भन्दै रास्वपाभित्र तिव्र असन्तुष्टि छ ।
र, अब बालेनले काठमाडौं महानगरको मेयरबाट राजीनामा दिएपछि बालेन रविको निसानामा पर्ने धेरैको प्रक्षेपण छ । हुन त चुनावपछि बालेन प्रधानमन्त्री हुने भन्ने कुरा पनि कहाँ सजिलो छ र ? चुनावमा बालेनले जित्नुपर्यो, रास्वपाले बहुमत ल्याउनुपर्यो, रास्वपाको संसदीय दलको नेतामा बालेन चुनिनुपर्यो, संसदमा प्रधानमन्त्रीको चुनाव जित्नुपर्यो ।
मान्छेहरुले त अब बालेन प्रधानमन्त्री हुने भए भन्ठानेका छन् । राजनीतिमा खास चलखेल त चुनाव पछि हुन्छ । यो कुरा बालेनले पनि बुझेकै होलान् । बालेनको क्रेजका कारण आउने भोट थोपरेर पार्टीलाई ठूलो बनाउन रवि सफल होलान् तर बालेनको महत्वाकांक्षा पूरा नहुने निश्चित छ ।
