काठमाडौ । कुनै बेला आमनेपालीको भरोसाको केन्द्र जस्तै बनेको रास्वपा अहिले नराम्ररी थलिएको छ । खासगरी जेन जी आन्दोलनका क्रममा पार्टी सभापति रवि लामिछानेले जेलब्रेक गरेसँगै रास्वपामा मतभेद बढेको हो ।
केही समय अघिदेखिनै सहकारी ठगीमा जेल परेका पार्टी सभापति रवि लामिछानेको विकल्प खोज्नुपर्ने विषयमा रास्वपाभित्र बहस चलेकै थियो । पार्टीभित्रको एउटा ठूलो पंक्तिले सभापतिको विकल्प खोज्नुपर्ने आवाज उठाए पनि रविको लोकप्रियताका अगाडि त्यो फिक्का भएको थियो । तर जब भदौ २४ गते जेलब्रेक गरेर रविलाई बाहिर निकालियो, तब रास्वपाको ओरालो यात्रा सुरु भयो ।
यो विषयले पार्टी भित्र र बाहिर नै ठूलो तरंग ल्याइदियो । रविको जेलब्रेकपछि थुप्रै रास्वपाका नेता तथा कार्यकर्ताले पार्टी छाडिसकेका छन् । यसै परिस्थितिबीच अहिले पनि रास्वपाभित्र सभापतिको रास्वपाको विकल्प खोज्ने कि नखोज्ने भन्नेमा चर्को मतभेद छ । यसअघि जे पनि कुरामा प्रतिक्रिया दिन हतार गर्ने रास्वपाका नेताहरु पनि अहिले मौन छन् ।
किनकि, पार्टीभित्र बढेको द्वन्द्वका कारण उनीहरुको मुखमा बुजो लागेको छ । रास्वपाभित्र बढेको अन्तरद्वन्द्वको परिणाम हो, बिहीबार सार्वजनिक भएको एउटा समाचार । रविको ठाउँमा कुलमानलाई ल्याउने भन्ने उक्त समाचार नियोजित भएको बुझ्न कठिन छैन । काठमाडौं महानगरका मेयर बालेन साहको समेत समर्थनमा कुलमानलाई रास्वपाको सभापति बनाउन लागिएको भनिएको उक्त समाचारको न्यारेसन रास्वपाकै एक तहका नेताहरुले तय गरेको बुझिएको छ ।
खासगरी रास्वपाको ‘एन्टी रवि’ समूहले रविलाई कमजोर पार्न उक्त न्यारेटिभ सेट गरेर मिडिया ट्रायल गरेको रास्वपाकै नेताहरुले बताउन थालेका छन् । स्रोतको हवला दिएको सार्वजकि गरिएको उक्त समाचारको विपक्षमा रास्वपाले आधिकारिक रुपमा त कुनै आपत्ति जनाएको छैन, तर रवि लामिछानेको अतिविश्वासिला पात्र भनेर चिनिएका दीपक बोहोराले उक्त समाचारको खण्डन गरेका छन् ।
त्यस्तै रविका अर्का निकटस्थ पात्र प्रमोद न्यौपानेले पनि उक्त समाचार भ्रामक भएको उल्लेख गरेका छन् । अझ प्रष्टसँग भन्ने हो भने, पार्टी उपसभापति डिपी अर्यालसहित केही नेताहरु रविलाई नै सभापति मानेर अघि बढ्नुपर्ने लाइनमा अडिग छन् भने स्वर्णिम वाग्लेसहितका नेताहरु रविको विकल्प खाज्नैपर्ने निष्कर्षमा पुगेका छन् । यसरी रविलाई सभापतिमा कायम राख्ने कि विकल्प खोज्ने भन्ने विषयले रास्वपा फुटको नजिक पुगेको हो ।
