‘मन्त्री’ नभनी ‘कवाडी वैज्ञानिक मन्त्री’ भन्न महावीर पुनको आग्रह

काठमाडौं । राष्ट्रिय आविष्कार केन्द्रका संस्थापक महावीर पुनले आफूलाई शिक्षा, विज्ञान तथा प्रविधिमन्त्री नियुक्त हुने प्रक्रियामा बधाई मात्र दिनका लागि सम्पर्क नगर्न आग्रह गरेका छन्।

सुशीला कार्की नेतृत्वको सरकारले उनलाई मन्त्री बनाउने तयारी गरिरहेकै बेला पुनले बधाई दिनेहरूलाई खादा र माला नल्याउन आग्रह गरेका हुन्। उनले यसको साटो मन्त्रालयको क्षेत्राधिकारभित्र पाँच महिनाभित्र गर्न सकिने ठोस काम र विचारहरू व्हाट्सएपमार्फत् पठाउन आग्रह गरेका छन्।पुनले आफूलाई साधारण रूपमा ‘मन्त्री’ नभनी ‘कवाडी वैज्ञानिक मन्त्री’ भन्न आग्रह पनि गरेका छन्।

उनले भनेका छन्, “मेरो पहिलो घोषणा यही हो— बधाई दिन फोन नगर्नुहोस्, खादा माला लिएर नआउनुहोस्। बरु शिक्षा, विज्ञान र प्रविधि क्षेत्रमा गर्न सकिने र गर्नै पर्ने काम वा आइडिया छ भने मेरो ह्वाट्सएपमा पठाउनुहोस्।”