मन्त्रीहरूले धमाधम राजीनामा दिएपछि रिक्त मन्त्रालयहरूको कार्यभार प्रधानमन्त्री कार्कीको काँधमा

काठमाडौं । जेन–जी आन्दोलनपछि बनेको सुशीला कार्की नेतृत्वको चुनावी सरकारका मन्त्रीहरूले धमाधम राजीनामा दिएर बाहिरिएसँगै रिक्त मन्त्रालयहरूको जिम्मेवारी स्वयम् प्रधानमन्त्री कार्कीको काँधमा आएको छ ।

खासगरी प्रतिनिधिसभा निर्वाचनका लागि मन्त्रीहरू नै उमेदवारका आकांक्षी देखिएपछि राजीनामा आएको हो । प्रधानमन्त्रीसमक्ष शिक्षा, विज्ञान तथा प्रविधिमन्त्री महावीर पुन, सञ्चार तथा सूचना प्रविधिमन्त्री जगदीश खरेल र युवा तथा खेलकुदमन्त्री बब्लु गुप्ताले पछिल्लोपटक पदबाट राजीनामा दिएका छन् ।

यी मन्त्रीहरूले सम्हालेका मन्त्रालयहरू नेतृत्व रिक्त भएसँगै प्रधानमन्त्री कार्कीले नै सम्हाल्ने गरी राष्ट्रपति रामचन्द्र पौडेलले जिम्मेवारी तोकेका हुन् ।