चौतारा । नेपाल–चीनबीचको प्रमुख व्यापारीक नाका तातोपानी आंशिक रुपमा सञ्चालनमा आएको छ । ३ हप्तादेखि पहिरोका कारण अवरुद्ध रहेको कोदारी सडक खण्ड बिहीबारदेखि आंशिक रूपमा सञ्चालनमा आएको हो ।
अरनिको राजमार्गअन्तर्गत भोटेकोशी गाउँपालिका वडा नंम्वर –२ स्थित इको पहिरो क्षेत्रमा साउन १७ गते राति खसेको भीषण पहिरोले सडक भासिएको थियो । पहिरोको कारण नेपाल–चीनबीचको प्रमुख व्यापारीक नाका तातोपानी ठप्प भएको थियो ।
वर्षायामको कारण निरन्तर पहिरो झर्ने इको क्षेत्र सडक अवरुद्ध हुने उच्च जोखिममा रहँदै आएको छ । पहिरो पन्छाउन सडक डिभिजन कार्यालय चरिकोट, भोटेकोसी गाउँपालिका, तथा नाका सम्बन्धित व्यवसायीहरूले निरन्तर प्रयास गर्दै आएका थिए ।
सडक अवरुद्ध हुँदा दशैं, तिहार, छठजस्ता चाडपर्वलाई लक्षित गरेर चीनतर्फ रोकिएका सामग्रीहरू नेपाल भित्र्याउन नसक्दा व्यवसायीहरू चिन्तित बनेका थिए । सिन्धुपाल्चोक उद्योग वाणिज्य संघका अध्यक्ष बुद्धराज बस्नेतका अनुसार व्यवसायीहरुले ३ हप्तादेखि सडक बन्द हुँदा ठूलो आर्थिक घाटा व्यहोर्नुपर्यो । केही सामग्री त भरियाले वोकेर पहिरो पार गरेर ल्याउनुपर्यो । अहिले सडक खुलेको छ, तर पानी परेपछि फेरि पहिरो जाने डर कायमै छ ।
बिहीबार मात्रै अड्किएका ३० वटा सामग्री बोकेको कन्टेनर भन्सार यार्डमा पुगेका तातोपानी भन्सार कार्यालयले जनाएको छ । नेपालतर्फबाट हालसम्म ६ वटा खाली कन्टेनर चीन पठाइसकिएको र बेलुकासम्म १५–२० वटा थप कन्टेनर मितेरी पुलको छेउमा पठाइने व्यवसायी विजय शेर्पाले जानकारी दिए । हाल नेपाल छिरेका कन्टेनर संख्या ४५ रहेको छ भने चिनियाँ भूभागतर्फ न्यालम, ढिङ्ग्रे, खासा र जाङ्बु पोर्टमा करिब ५ सय कन्टेनर रोकिएका छन् ।
सडकको अवस्था सामान्य रहेमा ती कन्टेनर दुई दिनभित्र नेपाल भित्रिने अपेक्षा व्यवसायीहरुले गरेका छन् । चिनियाँ पक्षले जाँचपास प्रक्रियामा समय लिने भएकाले ढिलाइ हुन सक्ने व्यवसायीहरू बताउँछन् । सरकारी निकाय, निजी क्षेत्र र नाका सम्बन्धित व्यवसायीहरूको सहकार्यमा पहिरो पन्छाएर अस्थायी रूपमा संचालनमा ल्याइएको कोदारी सडक खण्डको दीर्घकालीन समाधानका लागि थप पहल आवश्यक देखिएको छ ।
