इजरायली प्रधानमन्त्री नेतान्याहुले गरे विपिन जोशीको परिवारसँग भेटघाट

काठमाडौं । इजरायली प्रधानमन्त्री बेञ्जामिन नेतान्याहुले हमासको कब्जामा रहेका नेपाली विद्यार्थी विपिन जोशीका परिवारसँग भेटघाट गरेका छन् । हमासद्वारा बन्दी बनाइएका नेपाली विद्यार्थी विपिन जोशीको आमा पद्मा र बहिनी पुष्पासँग मंगलबार भेट गर्दै प्रधानमन्त्री नेतान्याहुले विपिनको रिहाईका लागि आफ्नो सरकारले कुनै कसर बाँकी नराख्ने आश्वासन दिएका छन् ।

भेटका क्रममा प्रधानमन्त्रीले विपिनको रिहाईका लागि प्रयास गर्न सुझाव पनि दिएका छन् । केही अरब मुलुकको हमाससँग सम्बन्ध रहेको र ती मुलुकसँग नेपालको सुमधुर सम्बन्धको स्मरण गराउँदै नेतान्याहुले यस्तो सुझाव दिएका हुन् । विपिनका आमा र बहिनी इजरायल सरकारको पहलमा इजरायल पुगेका हुन् ।