बाह्रविसेका स्थानीयमा यसरी आयो ‘यू टर्न’, हिजो ‘गो ब्याक कालिका’ भन्नेहरु नै ‘वेलकम कालिका’ भन्न थाले 

काठमाडौं । कालिका इनर्जी प्रालिले बाह्रविसेमा बनाउन लागेको भोटेकोशी– ५ जलविद्युत आयोजनाप्रति केही समयअघिसम्म त्यहाँका केही स्थानीय एकदमै नकारात्मक थिए । आयोजना बनेपछि घरबास नै उठ्छ भनेर फैलाइएको भ्रम र केही स्थानीय ठूलाठालूको निहीत स्वार्थमा प्रयोग भएका केही स्थानीय पनि अहिले खुलेरै आयोजनाको पक्षमा लागेका छन् ।

त्यसकै फलस्वरुप सोमबार आयोजनाले बाह्रविसेमा भव्यसँग सार्वजनिक सुनुवाइ सम्पन्न गरेको छ । र, आयोजनाले स्थानीय सरोकारवालासँग १० बुँदे सम्झौतासमेत सम्पन्न गरेको छ । यसरी हिजो ‘गो ब्याक कालिका’ भन्ने केही मान्छे पनि ‘वेलकम कालिका’ भन्ने भएका छन् ।

यससँगै अब आयोजनाले द्रुत गतिमा काम अघि बढाउने कालिका इनर्जी प्रालिका अध्यक्ष मोहनविक्रम कार्कीले बताए । आयोजनाले मंगलबार प्रभावित क्षेत्र त्रिपुरासुन्दरी गाउँपालिकामा पनि सार्वजनिक सुनुवाइ सम्पन्न गरेको छ ।

गाउँपालिका अध्यक्ष भक्तध्वज बोहोराको प्रमुख आतिथ्यतामा सार्वजनिक सुनुवाइ सम्पन्न भएको हो ।